ރޯގާތައް ފެތުރެމުންދަނިކޮށް މާލޭ ސިޓީގައި ނައިޓް މާކެޓެއް ނުބާއްވާނެކަމަށް މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު މިހެން ވިދާޅުވެފައި މިވަނީ މާލޭގައި އަނެއްކާވެސް ނައިޓް މާކެޓެއް ބާއްވަން މާލޭ ސިޓީ ކައުންސިލުން ނިންމައި، އެކަމަށް ކުރިމަތިލުމަށް އިއުލާންކޮށްފައިވާ ދަނޑިވަޅެއްގައެވެ.

ސިޓީ ކައުންސިލުން ކުރި އިއުލާނުގައި ވަނީ ނައިޓް މާކެޓް ރާވައި، ހިންގަން ޝައުޤުވެރިވާ ފަރާތްތަކުން މި މަހު 20 ވަނަ ދުވަހުގެ ކުރިން އެ ކައުންސިލަށް ޕްރޮޕޯސަލް ހުށަހަޅަން ހުޅުވާލާފައެވެ.

މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވީ ނައިޓް މާކެޓް ބާއްވަން އިއުލާން ކޮށްފައިވީނަމަވެސް ނައިޓް މާކެޓް ބާއްވާނީ މާލެ ސިޓީގައި ކޯވިޑްގެ ކޭސްތައް އެންމެ ބޮޑަށް މަދުވި ދުވަސްވަރު ހުރިވަރަށް މަދުވީ ދުވަހަކުން ކަމަށެވެ. އަދި ކޯވިޑާއި ޑެންގޫ ފަދަ ރޯގާތައް ގިނަ ދުވަސްވަރެއްގައި ސިޓީ ކައުންސިލުން މާލެ ސިޓީގައި ނައިޓް މާކެޓެއް ނުބާއްވާނެކަމަށްވެސް މޭޔަރ ވިދާޅުވިއެވެ.

Night Market baavvan koffaivaa iulaan koffaivee namaves NightMarket baavvaanee Male city gai covid cases thah emme bodah madhuvi iru huri varah madhu vee dhuvahakunkan dhannavan.Covid aa dengue fadha roagaathah gina ireggai City Council in Male city gai NightMarket nubaavvaanan.

— Dr Mohamed Muizzu (@MMuizzu) July 9, 2022

މި އަހަރުގެ ރޯދަމަހާ ދިމާކޮށްވެސް މާލެ ސިޓީ ކައުންސިލުން މާލޭގައި ނައިޓް މާކެޓެއް ބާއްވަން އުޅުުނުނަމަވެސް ފަހުން ވަނީ އެކަން ކެންސަލްކޮށްފައެވެ. ޤަވާއިދުތައް ބުނާގޮތުން މާލެ ސިޓީގައި ނައިޓް މާކެޓްތައް ބޭއްވޭނީ މާލެ ސިޓީ ކައުންސިލުންނެވެ. ސިޓީ ކައުންސިލުން އެންމެފަހުން މާލޭގައި ނައިޓް މާކެޓެއް ބޭއްވީ އާ އަހަރާ ދިމާކޮށް މިދިޔަ އަހަރު ޑިސެމްބަރުމަހުއެވެ.