އެތެރެހަށީގައި ފޮރުވައިގެން ރާއްޖެއަށް އެތެރެކުރި 2.3 ކިލޯގެ މަސްތުވާތަކެތި ކަސްޓަމްސުން އަތުލައިގެންފިއެވެ.

މޯލްޑިވްސް ކަސްޓަމްސް ސަރވިސްއިން ބުނީ މި ތަކެތި އަތުލައިގެންފައިވަނީ، ވައިގެމަގުން އިތިއޯޕިއާއިން ރާއްޖެއައި 02 މީހެއްގެ އަތުން ކަމަށެވެ. މި 02 މީހުންވެސް މަސްތުވާތަކެތި އެތެެރެކުރަން އުޅެފައިވަނީ ދިރުވާލައިގެން ހަށިގަނޑުގެ އެތެރޭގައި ފޮރުވައިގެންނެވެ.

މަސްތުވާތަކެތި އެތެރެކުރި ދެމީހުންނަކީވެސް އުމުރުން 41 އަހަރުގެ އިނގިރޭސިވިލާތުގެ 2 ފިރިހެނުންނެވެ. މިދިޔަ ޖޫން މަހުގެ 28 ވަނަ ދުވަހު ރާއްޖެއައި މި ދެ ފަސިންޖަރުންގެ ޢަމަލުތައް ހުރިގޮތުން، އެމީހުންގެ ހަށިގަނޑުގެ އެތެރޭގައި މަސްތުވާތަކެތި ފޮރުވާފައިހުރި ކަމަށް ޝައްކުކުރެވިގެން، ކަސްޓަމްސުން ވަނީ މި ދެ ފަސިންޖަރުންގެ ހަށިގަނޑު ސްކޭންކޮށްފައެވެ.

ކަސްޓަމްސުން ބުނީ މި ފަސިންޖަރުންގެ އެތެރެހަށިން "ފޮރިން ބޮޑީސް" ފެނިފައިވާއިރު، މިފޮރިން ބޮޑީސްތަކުގެ ތެރޭގައި މަސްތުވާތަކެތީގެ ބާވަތެއްކަމަށްވާ "ކޮކެއިން" ރައްކާކޮށްފައިވާ ކަމަށް ޝައްކުކުރެވުނުކަމަށެވެ.

"މި ދެ ފަސިންޖަރުންގެ އެތެރެހަށިން "ފޮރިން ބޮޑީސް" ގެ ގޮތުގައި ޖުމްލަ 220 ބުލެޓް ނަގާފައިވާއިރު، މިތަކެތީގެ ޖުމްލަ ބަރުދަނުގައި ޕެކިންގއާއެކު 2.328 ކިލޯގްރާމް ހުއްޓެވެ. އަދި މިތަކެތީގެ މަގުމަތީ އަގު އަށް މިލިއަން އެއްލައްކަ ރުފިޔާއަށް އަރައެވެ." ކަސްޓަމްސްގެ ބަޔާނުގައިވެއެވެ.

ކަސްޓަމްސުން ބުނީ، މިމައްސަލައިގައި ޝާމިލްވާ މީހުންނާއި އަތުލައިގަނެވުނު މަސްތުވާތަކެތި ކަމަށް ޝައްކުކުރެވޭ ތަކެތި މިހާރު ވަނީ އިތުރަށް ތަޙްޤީޤްކުރުމަށްޓަކައި މޯލްޑިވްސް ޕޮލިސް ސަރވިސްއާ ޙަވާލުކޮށްފައިކަމަށެވެ.