ރާއްޖޭގައި ފަތުރުވެރިކަމުގެ ދާއިރާއަށް މީހުން ތަމްރީނުކުރާ ބައިނަލްއަޤުވާމީ މަރުކަޒެއް ގާއިމްކުރުމުގެ ވިސްނުން ސަރުކާރުން ގެންގުޅޭކަމަށް ފަތުރުވެރިކަމާބެހޭ ވަޒީރު ޑރ. ޢަބްދުالله މައުސޫމް ވިދާޅުވެއްޖެއެވެ.

ރާއްޖޭގެ މީޑިއާއެއްގައި ރޭ ވާހަކަފުޅު ދައްކަވަމުން ޑރ. މައުސޫމް ވިދާޅުވީ ފަތުރުވެރިކަމުގެ ދާއިރާއަށް މީހުން ތަމްރީނުކުރުމަށް ބައިނަލްއަޤްވާމީ މަރުކަޒެއް ރާއްޖޭގައި ގާއިމްކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްގެ އަމާޒެއް ކަމަށާއި އިރާދަކުރެއްވިއްޔާ އެކަން ޙަޤީޤަތަކަށްވާނެ ކަމަށެވެ. ދިވެހިންގެ މެހެމާންދާރީ އަދާކުރުމުގެ ސިފައަކީ އެހެންބަޔަކަށް އެކަމާ ވާދަކުރެވޭނެ ކަމެއްނޫންކަމަށް ޑރ. މައުސޫމް ވިދާޅުވިއެވެ.

މިނިސްޓަރ މައުސޫމް ވިދާޅުވީ މިއީ ފަތުރުވެރިކަން ކިޔަވަން ރާއްޖެ އަންނަންވީ ޒަމާންކަމަށާއި ފަތުރުވެރިކަމުގެ ދާއިރާގައި ރާއްޖެއާ ވާދަކުރެވޭ ވަރުގެ ފެސިލިޓީތައް އެހެން ޤައުމެއްގައި ނުހުންނާނެކަމަށެވެ.

"ރާއްޖެއަކީ ފަތުރުވެރިކަމުގެ އެއްވަނަ މަންޒިލް. މިއީ ފަތުރުވެރިކަން ކިޔަވަން ރާއްޖެއަށް އަންނަންވީ ޒަމާން." ޑރ. މައުސޫމް ވިދާޅުވިއެވެ.

މިނިސްޓަރ ވިދާޅުވީ ފަތުރުވެރިކަމުގެ ދާއިރާއަށް މިހާރުއޮތް އެއް ދަތިކަމަކީ އެކަށީގެންވާވަރަށް ދިވެހިން ވަޒީފާތަކަށް ނުލިބުން ކަމަށެވެ. އެހެންކަމުން ބިދޭސީން ވަޒީފާތަކަށް ގެންނަންޖެހޭ ކަމަށާއި އެމީހުން ގެންނަނީ ދިވެހިން ނުލިބޭ ދާއިރާތަކުން ކަމަށްވެސް މިނިސްޓަރ ރޭ ވިދާޅުވިއެވެ.