ގައުމެއްގެ މިނިވަންކަން އަދި ސަލާމަތްތެރިކަން އެއީ އެއް ފައިސާ ފޮއްޗެއްގެ ދެފުށް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

"ރާއްޖެޓީވީ" އަށް މިއަދު ދެއްވި އިންޓަވިއުއެއްގައި އެމަނިކުފާނު ވިދާޅުވީ، ގައުމެއްގެ މިނިވަންކަން ދެމެހެއްޓުމަށް އެ ގައުމެއްގެ ސަލާމަތާ ރައްކާތެރިކަމަކީ ވަރަށްވެސް މުހިންމު ކަމެއް ކަމަށެވެ. އަދި މިނިވަން ކަމަކީ ވެސް ގައުމެއްގެ ސަލާމަތާ ރައްކާތެރިކަން ދެމެހެއްޓުމަށްޓަކައި އެހާމެ މުހިންމު ކަމެއްކަމަށް ރައީސް ވިދާޅުވިއެވެ.

"އަޅުގަނޑު ދެކޭގޮތުގައި ގައުމެއްގެ މިނިވަންކަމާ ގައުމެއްގެ ސަލާމަތާ މިއީ އެއް ފައިސާ ފޮއްޗެއްގެ ދެފުށް. ވަކި ނުކުރެވޭނެ ދެ އެއްޗެއް." ރައީސް ވިދާޅުވިއެވެ.



އެމަނިކުފާނު ވިދާޅުވީ، ގައުމެއްގެ މިނިވަންކަން ރައްކާތެރި ކުރުމަށްޓަކައި އެ ގައުމެއްގެ ސަލާމަތާ ރައްކާތެރިކަން ކަށަވަރު ކުރަން، ކުރަންޖެހޭ ކަންކަން އެ ގައުމަކުން ނުވަތަ ސަރުކާރަކުން ކުރަންޖެހޭނެކަމަށެވެ. އަދި ގައުމުގެ މިނިވަންކަން ރައްކާތެރިކުރުމަށްޓަކައި ހިޔާލުތަފާތުވުންތައް ދޫކޮށްލާ އެއްބައިވަންތަ ވާންޖެހޭ ދުވަސް އަންނާނެ ކަމަށާއި، މިއީ އެކަހަލަ ދުވަހެއް ކަމަށް އެމަނިކުފާނުގެ ވާހަކަފުޅުގައި ވިދާޅުވިއެވެ.

މިނިވަން ދުވަހާއި ގުޅުވައިގެން އެމަނިކުފާނުވަނީ ދިވެހި ހުރިހާ ރައްޔިތުންނަށް ދުވަހުގެ ހެޔޮ އެދުންތައް ފޮނުއްވާފައެވެ. މިއަދަކީ ރާއްޖޭގެ 57 ވަނަ މިނިވަން ދުވަހެވެ.