އެއްވެސްބަޔަކު ބާކީނުވާނެ ގޮތެއް ބަލައިގެން މެނުވީ، ޒުވާބުން އަރައެއް ނުގަނެވޭނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ދިވެހިރާއްޖޭގެ މިނިވަން ކަމަށް 57 އަހަރު ފުރޭ، 58 ވަނަ މިނިވަންދުވަހުގެ މުނާޞަބާގައި ދިވެހިޤައުމާއި މުޚާޠަބު ކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވިދާޅުވީ، އެއްވެސްބަޔަކު ބާކީނުވާނެ ގޮތެއް ބަލައިގެން މެނުވީ، ޒުވާބުން އަރައި ނުގަނެވޭނެ ކަމަށެވެ.

އެގޮތުން މުޖްތަމަޢުގެ ބައިބައިވުމާއި ދެބަސްވުމާއި ހަމަނުޖެހުމާއި ހައިޖާނަކީ ޤައުމެއްގެ މިނިވަންކަން ރަމްޒުކޮށްދޭ ކަމެއް ނޫން ކަމަށް ރައީސް މިއަދު ވިދާޅުވިއެވެ. އާއިލާ ތެރެއިން ފެށިގެން ދިރިއުޅޭ މާހައުލާއި ރަށާއި އަތޮޅާއި މުޅިޤައުމުގައިވެސް ހަމަޖެހުން އޮންނަންޖެހޭނެކަން ރައީސް މިއަދު ފާހަގަކުރެއްވިއެވެ.

"އެއްވެސް ބަޔަކު ބާކީ ނުވާނެ ހުރިހާ ގޮތެއް ބަލައިގެން މެނުވީ، ޒުވާބުން އަރައެއް ނުގަނެވޭނެ." ރައީސް މިއަދު ވިދާޅުވިއެވެ.

ރައީސް ވިދާޅުވީ ރާއްޖޭގައި ހަމަޖެހުން އޮންނަން ޖެހޭނެ ކަމަށާއި އެއީ އަޑުއެހުމާއި މަޝްވަރާއާއި އިޙްތިރާމުން މެނުވީ ގެނެވޭނެ އެއްޗެއް ނޫން ކަމަށެވެ. އަދި އަމިއްލަ ދިރިއުޅުމައިގެން ކުރާނެ ފިކުރާ، ހިނގާނެ މަގު، ރައްޔިތުންނަށް އޮންނަން ޖެހޭނެކަން ރައީސް ފާހަގަކުރެއްވިއެވެ.

"މިދެންނެވި މަގުން ގޮސްގެން މެނުވީ، ހަމަޖެހޭ އުފާވެރި ފާގަތި މިނިވަން ދިވެހިރާއްޖެ އެއް ލިބިގަތުމަށް ދަތިވާނެ." މިނިވަން ދުވަހުގެ ތަޙުނިޔާ ދިވެހި އެންމެހައި ރައްޔިތުންނަށް ފޮނުއްވަވައި، ރައީސުލްޖުމްހޫރިއްޔާ މިއަދު ދެއްވި ޚިތާބުގައި ވިދާޅުވެފައިވެއެވެ.