ރާއްޖޭގެ ޑްރަގް ލީޑަރުންނާ ގުޅުން އޮންނަ ކަމަށް ތުހުމަތުވާ ލަންކާގެ ޑްރަގް ލޯޑެއް ދުބާއީން ހައްޔަރުކޮށްފިއެވެ.

ލަންކާގެ ފުލުހުންގެ ނާކޮޓިކްސް ބިއުރޯއާ ޙަވާލާދީ އެޤައުމުގެ މީޑިއާތަކުން ރިޕޯޓު ކޮށްފައިވަނީ، ނަދުން ޗިންތަކާ ވިކްރަމަރަޓޭން، މަޝްހޫރު ނަމުންނަމަ ހަރަކް ކަޓާއަކީ ދުބާއީން ގިނަ ޤައުމުތަކަކަށް ޑުރަގް ޓްރެފިކްކުރުމުގައި އިސްކޮށް ހަރަކާތްތެރިވާ ކަމަށް ތުހުމަތުވާ ގޭންގް ލީޑަރެއް ކަމަށެވެ.

އޭނާ ހައްޔަރުކުރީ ލަންކާ ފުލުހުންގެ ނާކޮޓިކްސް ބިއުރޯ އާއި ބައިނަލްއަގުވާމީ ފުލުހުންގެ އިދާރާތަކާ ގުޅިގެން ހިންގި އޮޕަރޭޝަނެއްގައި ދުބާއީން މެލޭޝިއާއަށް ފުރަން ދުބާއީ އެއާޕޯޓްގައި ހުއްޓަ އެވެ. އޭނާ ވަނީ ވަގު ޕާސްޕޯޓެއްގައި ގިނަ ޤައުމުތަކަކަށް މީގެ ކުރިން އެތެރެވެފައެވެ. އޭގެތެރޭގައި ރާއްޖެވެސް ހިމެނޭކަމަށް މީޑިއާ ރިޕޯޓުތައް ބުނެއެވެ.

މިދިޔަ ބުރާސްފަތި ދުވަހު އޭނާ ހައްޔަރުކޮށްފައިވާއިރު އޭނާ ހައްޔަރުކުރުމުގެ އޮޕަރޭޝަން ހިންގާތާ މަހަކަށްވުރެ ގިނަ ދުވަސްވަނީ ވެފައެވެ. އޭނާގެ މަސްތުވާތަކެތީގެ ނެޓްވޯކާއި ގުޅުން އޮންނަ ޤައުމުތަކުގެ ތެރޭގައި ރާއްޖެ، މެލޭޝިއާ، ސިންގަޕޫރު އަދި ސީޝެލްސް ހިމެނެ އެވެ.

ހަރަކް ކަޓާ ވަނީ ފްރާންސުން ހިމާޔަތް ހޯދާފައެވެ. ނަމަވެސް ދުބާއީ އާއި ލަންކާއާ ދެމެދު ގާއިމުކޮށްފައިވާ ކުށްވެރިން ބަދަލުކުރުމުގެ އެއްބަސްވުމުގެ ދަށުން އޭނާ ލަންކާއަށް ގެންދިއުމުގެ މަސައްކަތް މިހާރުވަނީ ފަށާފައެވެ.