އިޔާދަކުރަނިވި ހަކަތަ އުފެއްދުމަށް ސްޓެލްކޯއިން ފަށާފައިވާ "އަވިކަތަ" ޕްރޮގްރާމަށް ބޮޑު ތަރުހީބެއް ލިބެމުންދާކަމަށް އެކުންފުނިން ހާމަކޮށްފިއެވެ.

"އަވިކަތަ"ގެ ނަމުގައި ކުރިއަށްގެންދާ މި ހަރަކާތުގައި ސްޓެލްކޯއިން ޢިމާރާތްތަކުގެ ފުރާޅު ކުއްޔަށް ނަގައި، އެފުރާޅެއް ހުރި ދިމާލުން އިރުގެ އަވި ލިބޭ މިންވަރު ބެލުމަށް ސަރވޭތަކެއް ކުރިއަށްގެންދާނެއެވެ. ފުރާޅުގެ ނިސްބަތުން ސޯލަރ ޕެނަލް ހަރުކުރުމުގެ ހުރިހާކަމެއް ކުރިއަށްގެންދަނީ ސްޓެލްކޯގެ ބެލުމުގެ ދަށުންނެވެ.

ސްޓެލްކޯގެ އެސިސްޓެންޓް އޮފިސަރ އަމްޝާދު އަޙްމަދު ވިދާޅުވީ، މި ޕްރޮގްރާމަށް ޢާއްމުންގެ ތަރުހީބު ލިބެމުންދާކަމަށާއި އެގޮތުން މިމަޝްރޫޢުއަށް ކުރިމަތިލުމަށް ހުޅުވާލިފަހުން މާލެއިން 90 އަށްވުރެ ގިނަ ގޭބިސީގެ ފުރާޅު ސްޓެލްކޯއަށް ދޫކުރުމަށް ފޯމު ހުށައަޅާފައިވާކަމަށެވެ. އަދި މިވަގުތު ކުރިއަށްދަނީ އެފަރާތްތަކުގެ ފުރާޅުތަކުގެ ސަރވޭގެ މަސައްކަތްތައްކަމަށް އޭނާ ވިދާޅުވެއެވެ.

ސްޓެލްކޯއިން ކުރިއަށްގެންދާ "އަވިކަތަ" ޕްރޮގްރާމުގައި ބައިވެރިވެވޭނީ ގޭގެ ވެރިފަރާތުގެ ހުއްދަ އޮތުމާއި ފުރާޅުގައި މަދުވެގެން 100 އަކަފޫޓް ހުންނަން ޖެހޭނެއެވެ. އަދި ފުރާޅަށް ފަސޭހައިން އަވި ލިބުމާއި ފުރާޅުގައި 150 ކިލޯގެ ބަރުދަން އުފުލާނެވަރު ހުންނަށް ޖެހޭނެއެވެ. މިސްކީމްގައި ހަރުކުރުމަށް ހަމަޖެހިފައިވަނީ ފުޅާ މިނުގައި 3.4 ފޫޓު އަދި 7.2 ފޫޓު ދިގު ސޯލަރ ޕެނަލްއެވެ.

2020 ވަނަ އަަހަރުން ފެށިގެން ސްޓެލްކޯއިން އަންނަނީ އިޔާދަކުރަނިވި ހަކަތަ އުފައްދާ މިންވަރު އިތުރުކޮށް އެ މަސައްކަތް އައު ހަރުފަތަކަށް ގެންދިޔުމަށް މަސައްކަތް ކުރަމުންނެވެ. އެގޮތުން އައު ސޯލަރ ސެންޓަރެއް ހުޅުވައި ރާއްޖޭގެ އެކި ހިސާބުތަކަށް އެ ޚިދުމަތް އަންނަނީ ފުޅާ ކުރަމުންނެވެ.