ސްޓެލްކޯ އިންޖީނުގޭގެ ފަޔަރސޭފްޓީ ސިސްޓަމް ވަރަށް ރަނގަޅަށް މަސައްކަތްކޮށްފި ކަމަށް ސްޓެލްކޯގެ ޗެއަރމަން ބްރިގޭޑިއަރ ޖެނެރަލް ރިޓަޔަރޑް އިބްރާހިމް މުޙައްމަދު ދީދީ މިއަދު ވިދާޅުވެއްޖެއެވެ.

މާލެއަށް ކަރަންޓް ފޯރުކޮށްދިނުމަށް ސްޓެލްކޯއިން ބޭނުންކުރާ އިންޖީނެއްގެ ޓާބޯގައި މިއަދުވަނީ އަލިފާން ރޯވެފައެވެ. ނަމަވެސް ވަރަށް ކުޑައިރުކޮޅެއްގެ ތެރޭގައި އެ އަލިފާން ނިއްވާލާފައިވާކަމަށް ސްޓެލްކޯއިން މަޢުލޫމާތުދެއެވެ.

އެކަމާ ގުޅިގެން ސްޓެލްކޯގެ ޗެއަރމަން ބްރިގޭޑިއަރ ޖެނެރަލް ރިޓަޔަރޑް އިބްރާހިމް މުޙައްމަދު ދީދީ ވިދާޅުވީ ސްޓެލްކޯ އިންޖީނުގޭގެ ފަޔަރ ސޭފްޓީ ސިސްޓަމް ވަރަށް އިފެކްޓިވްކޮށް މަސައްކަތް ކޮށްފައިވާ ކަމަށެވެ. އަދި އެކަމަށްޓަކައި ޙަމްދު ކުރާކަމަށް ދީދީ ވިދާޅުވިއެވެ.

"މިއަދު މި ސަލާމަތްވީ ބޮޑު މުސީބާތަކުން." ދީދީ ވިދާޅުވެފައިވެއެވެ.

އެމްއެންޑީއެފުން ބުނީ މިއަދު މެންދުރު ސްޓެލްކޯގެ އިންޖީނެއްގައި އަލިފާނުގެ ހާދިސާއެއް ހިނގިކަމުގެ ރިޕޯޓް ލިބުނީ 12:15 ގައިކަމަށެވެ. އަދި 12:26 ހާއިރު އަލިފާންގަނޑު ނިއްވާލާފައިވާ ކަމަށް އެމްއެންޑީއެފް އިން ބުންޏެވެ.

އެމްއެންޑީއެފުން ބުނީ މި ހާދިސާގައި އެއްވެސް މީހަކަށް އަނިޔާނުވާކަމަށެވެ.