ކުރީގެ ސަރުކާރުތަކުން ށ. ފޭދޫއަށް ގެނެސްދީފައިނުވާ ތަރައްގީ، މި ސަރުކާރުން ގެނެސްދެމުންދާކަމަށް ފޭދޫ ކައުންސިލުން ބުނެފިއެވެ.

ފޭދޫ ކައުންސިލަރުން މާލެއަށް މިހާރު ކުރަމުންދާ ދަތުރުގައި ރައީސް ޞާލިޙާއިއެކު މިއަދު ރައީސް އޮފީހުގައި ބޭއްވި ބައްދަލުވުމުގައި، ކައުންސިލުން ވަނީ، ފޭދޫގެ ތަރައްގީއަށް ކުރަންހުރި ކަންކަން، ރައީސް ވައުދުވެވަޑައިގެންނެވި ގޮތަށް ކޮށްދެއްވަމުން ގެންދަވާކަން ފާހަގަ ކުރައްވާފައެވެ.

އެގޮތުން، ރަށުގެ ތަރައްގީއަށް އަމާޒުކޮށް ވޭތުވެދިޔަ ސަރުކާރުތަކުން ހިންގައިފައިނުވާހާ ގިނަ ތަރައްގީގެ މަޝްރޫއުތައް މިހާރު ވެސް ހިނގަމުންދާކަން ކައުންސިލުން ވަނީ ފާހަގަ ކޮށްފައެވެ. އަދި ކައުންސިލުން ވަނީ އެކަމަށްޓަކައި ފޭދޫގެ ރައްޔިތުންގެ ނަމުގައި ރައީސް ޞާލިޙަށް ޝުކުރު އަދާކޮށްފައެވެ.

މި ބައްދަލުވުމުގައި، ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީއިން ވަނީ އެރަށުގެ ޒުވާނުނަށް ހޭންޑްބޯލް ކުޅޭނެ ކޯޓެއް ބޭނުންވާކަން ފާހަގަކުރައްވާފައެވެ. އަދި ކައުންސިލް އިދާރާގެ ޖާގައިގެ ދަތިކަމާއި، އަތޮޅުގައި ޓޫރިޒަމް ސިނާއަތް އިތުރަށް ތަރައްގީ ކޮށްދެއްވުމަށާއި، ރަށުގެ ރައްޔިތުންގެ ސަލާމަތާއި ރައްކާތެރިކަމަށްޓަކައި ރަށުގައި އިތުރު ފުލުހުންނަށް މަސައްކަތް ކުރެވޭނެ މަގުފަހިކޮށްދެއްވުމަށާއި، ރަށްގިރުމުގެ މައްސަލައަށް ހައްލެއް ހޯދަން ބޭނުންވާކަމަށް ރައީސް އަރިހުގައިވަނީ ދަންނަވާފައެވެ. މީގެ އިތުރުން މިހާރު ތަރައްގީ ކުރަމުންދާ ބަނދަރަށް ގެންނަން ބޭނުންވާ ބަދަލުތައް ވެސް ކައުންސިލަރުން ވަނީ ރައީސާއި ހިއްސާ ކޮށްފައެވެ.

ރައީސް ވަނީ، ސަރުކާރުން ފޭދޫގައި ކުރިޔަށް ގެންދާ ކަންކަން އެރަށުގެ ރައްޔިތުން ބަލައިގެންފައިވުމުން އެކަން ފާހަގަ ކުރައްވައި ޝުކުރު އަދާކުރައްވާފައެވެ. މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި، އެމަނިކުފާނު ވަނީ ބަނދަރުގެ މަޝްރޫއު ނިމިގެން ދާއިރު ރަށުގެ ގިރާ ސަރަހައްދު ހިމާޔަތް ކުރެވިގެންދާނެ ކަމުގައި ފާހަގަ ކުރައްވާފައެވެ. އަދި ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީން ފާހަގަކުރި ކަންކަން ސަރުކާރުގެ ކަމާބެހޭ މުއައްސަސާތަކާ މަޝްވަރާކުރައްވައި އެކަންކަން ފުރިހަމަ ކުރެވޭތޯ ބައްލަވައިދެއްވާނެ ކަމަށް ވިދާޅުވިއެވެ.