އެންމެބޮޑު އަމާޒަކީ މަރުކަޒީ ސަރުކާރު ކައުންސިލްތަކަށް ބަހާލުން ކަމަށް ލޯކަލް ގަވަރމަންޓް އޮތޯރިޓީގެ ސީއީއޯ ފާތިމަތު އަފްޝަން ލަތީފް ވިދާޅުވެއްޖެއެވެ.

އެމްޑީޕީގެ ކޮންގްރެސް މަންދޫބުންނާއި މުހާތަބު ކުރަށްވައި ވާހަކަފުޅު ދައްކަވަމުން އެލްޖީއޭގެ ސީއީއޯ ފާތިމަތު އަފްޝަން ލަތީފް މިއަދު ވިދާޅުވީ އެންމެބޮޑު އަމާޒަކީ މަރުކަޒީ ސަރުކާރު ކައުންސިލްތަކަށް ބަހާލުން ކަމަށެވެ. އެގޮތުން އިޖުތިމާޢީ މަރުކަޒުތައް ކައުންސިލްތަކާ ޙަވާލުކޮށްފައިވާ ކަމަށާއި މިސްކިތްތަކާއި ޕާކުތައްވެސް ޙަވާލުކޮށްފައިވާ ކަމަށް އަފްޝަން ވިދާޅުވިއެވެ.

އަފްޝަން ވިދާޅުވީ ކައުންސިލްތަކުގައި މިހާރު ޖޮބް ސެންޓަރުގެ ޑެސްކުތައްވެސް ޤާއިމުކޮށްފައިވާ ކަމަށެވެ.

"ޕީއެސްއައިޕީ ޕްރޮޖެކްޓުތައްވެސް ކައުންސިލްތަކާއި ޙަވާލުކުރެވި ޓޫރިޒަމަށް ބިން ކަނޑައެޅުމުގެ ބާރުވެސް ކައުންސިލްތަކަށް މިހާރުވަނީ ދޫކޮށްލާފައި." އަފްޝަން ވިދާޅުވިއެވެ.

އަފްޝަން ވިދާޅުވީ ކައުންސިލްތަކުގެ އެންމެބޮޑު ކަންބޮޑުވުމަކީ ބަޖެޓުގެ ދަތިކަން ކަމަށާއި އެކަން ޙައްލު ކުރުމަށް ދަޢުލަތުގެ ބަޖެޓުގެ ފަސް އިންސައްތަ މިހާރު ކައުންސިލްތަކަށް ހަމަޖައްސާފައިވާ ކަމަށެވެ.

ނަމަވެސް ކައުންސިލަރުންގެ ޢަދަދު އިތުރުވުމާއި އެހެނިހެން ގޮތްގޮތުން މުސާރައަށް ކުރަންޖެހޭ ހޭދަ އިތުރުވެފައިވާތީ ބަޖެޓުގެ ފަސް އިންސައްތައަކީ އެންމެ އެކަށީގެންވާ ޢަދަދު ނޫންކަމަށް ޤަބޫލު ކުރަށްވާ ކަމަށްވެސް އަފްޝަން ވިދާޅުވިއެވެ.