ކުރިއަށް އޮތް ރިޔާސީ އިންތިހާބު އެމްޑީޕީން ކާމިޔާބު ކުރަން ބޭނުންވާނަމަ، އެންމެ މުހިންމު ކަމަކީ ޕާޓީ އެކަތިގަނޑެއްގެ ގޮތުގައި އޮތުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

މިހާރު ފެށިގެން ކުރިއަށްދާ އެމްޑީޕީގެ ކޮންގްރެސްގެ ހަވާސާގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ، ކޮންގްރެސްއިން ފެނިގެން ދަނީ ހިޔާލުތަފާތުވުންތަކާއެކު ވެސް ކުރިއަށް ދެވިދާނެކަން ކަމަށެވެ. އަދި ވެރިކަމުގެ ނިޒާމު ބަދަލު ކުރުމާމެދު ހުށަހެޅިފައިވާ ގަރާރާއި މެދު މާދަމާ ފުޅާ ދާއިރާއެއްގައި ބަހުސްކުރުން ކުރިއަށް ދާނެކަމަށް އެމަނިކުފާނު ވިދާޅުވި އެވެ. އެގޮތުން ރައީސް ނަޝީދު ބޭނުންފުޅުވާގޮތް އެއޮތީ އިއުލާނު ކުރައްވާފައި ކަމަށާ، އަދި އެމަނިކުފާނުގެ ބަސްފުޅުވެސް އެވަނީ ހާމަ ކުރެވިފައި ކަމަށް ރައީސް ޞާލިހު ވިދާޅުވިއެވެ.

އެމަނިކުފާނު ވިދާޅުވީ، ދެން މިކަމުގައި އޮންނާނީ ހައްލު ހޯދުން ކަމަށާ، އަދި ހަމަ ޔަގީނުން ވެސް މިކަމުގައި ހައްލެއް ހޯދޭނެކަމަށެވެ. އަދި ކުރިއަށް އޮތް ރިޔާސީ އިންތިހާބު ކާމިޔާބު ކުރުމަށްޓަކައި އެންމެ މުހިންމު އަދި ފުރަތަމަ ކަމަކީ ޕާޓީ އެއްކޮށް އޮތުންކަމަށާ އެކަމަށްޓަކައި ކޮންގްރެސްގެ ތެރެއިން އެންމެންގެ ވިސްނުން އެ ދިމާއަށް ގެންދާނެކަމަށް ވެސް އެމަނިކުފާނު ވިދާޅުވިއެވެ.

"ކޮންމެ މީހަކު ވެސް ވިސްނަންވާނެ ގައުމުގެ މުސްތަގުބަލަށް، ޕާޓީގެ މުސްތަގުބަލަށް، އެއަށްފަހުގައި އަޅުގަނޑުމެން ގޮތެއް ނިންމަންވާނީ" ރައީސް ވިދާޅުވިއެވެ.

ފޯރިއާއިއެކު ކޮންގްރެސް ކުރިއަށް ދިޔަނަމަވެސް، ކޮންގްރެސްގެ ތެރޭގައި މައިގަނޑު ގޮތެއްގައި އޮތް މައުޟޫއަކީ ނިޒާމުގެ ވާހަކައެވެ. އެ ވާހަކަ ކޮންގްރެސްގެ އެކި ހިސާބުތަކުން ރައީސް ނަޝީދު އިސްވެ ގެންދަވަނީ ތިލަ ކުރައްވަމުންނެވެ. ނަމަވެސް، ރައީސް ޞާލިޙަށް ތާއީދު ކުރައްވާ ބޭފުޅުން ދަނީ އެކަމާ ހިޔާލު ތަފާތުކަން ހާމަ ކުރައްވަމުންނެވެ.

މި ވާހަކަތަކުގެ ތެރެއިން، ކޮންގްރެސްގެ ހަވާސާގައި ރައީސް ނަޝީދު މިހާރުވަނީ، ނިޒާމީ ބަދަލާމެދު ކޮންގްރެސްއިން ނިންމާ ގޮތެއްގެ ސަބަބުން އެމްޑީޕީއާއިއެކު ކުރިއަށް ވަޑައިނުގެންނެވިދާނެކަމުގެ އިޝާރާތް ކުރަށްވައި އަދި އިންޒާރު ވެސް ދެއްވައިފަ އެވެ.