ޕޯސްޓް މެދުވެރިކޮށް ރާއްޖެއަށް އެތެރެކުރި މަސްތުވާތަކެތި ބަލައިދިޔަ އަންހެންމީހާގެ ބަންދަށް 30 ދުވަސް ޖަހައިފިއެވެ.

ފުލުހުން ކޯޓުގައިބުނީ އުމުރުން 23 އަހަރުގެ އެ އަންހެންމީހާ ފުލުހުންގެ ކޮންޓްރޯލް ޑްރަގް ޑެލިވަރީއަށް އެއްބާރުލުން ދީފައިނުވާ ކަމަށެވެ. އަދި އޭނާ މަސްތުވާތަކެތީގެ ބާވަތަކަށް ޕޮޒިޓިވް ވެފައިވާ ކަމަށްވެސް ފުލުހުންވަނީ ބުނެފައެވެ. އެހެންކަމުން ކޯޓުން ވަނީ އޭނާގެ ބަންދަށް 30 ދުވަސް ޖަހާފައެވެ.

އަތުލައިގަތް މަސްތުވާތަކެއްޗާ ގުޅޭގޮތުން ކަސްޓަމްސުން ބުނެފައިވަނީ އެތަކެތި އަތުލައިގަތީ މިދިޔަ މަހުގެ 25 ވަނަ ދުވަހު ޖަރުމަނުވިލާތުން ޕޯސްޓު މެދުވެރިކޮށް ރާއްޖެ ގެނައި ޕާރުސަލްތަކެއް ބަލާ ފާސްކުރުމުގެ ތެރޭގައި ކަމަށެވެ.

އެގޮތުން ބަލާ ފާސްކުރި ޕާރްސަލެއްގައި މަސްތުވާތަކެއްޗަށް ޝައްކު ކުރެވޭ ހަތަރު ޕާރްސަލެއް ފެނުނު ކަމަށާއި އޭގެތެރެއިން ދެ ޕާރްސަލުގެ ތެރޭގައި ހުރި އެއްޗެއް މަސްތުވާތަކެތީގެ ބާވަތެއް ކަމަށްވާ "ކެޓެމައިން" އަށް ފުރަތަމަ މަރުހަލާގައި ޕޮޒިޓިވްވި ކަމަށާ އަނެއް ދެ ޕެކެޓު ކޮކެއިނަށް ޕޮޒިޓިވްވި ކަމަށް ވެސް ކަސްޓަމްސުން ބުނެފައިވެއެވެ.

އަތުލައިގަތް މަސްތުވާތަކެތީގެ ބަރުދަނުގައި 1.674 ކިލޯ ހުރި ކަމަށާއި އެތަކެތީގެ މަގުމަތީ އަގު ފަސް މިލިއަން ރުފިޔާއަށް އަރާ ކަމަށް ކަސްޓަމުން ބުނެފައިވެއެވެ.

ފަހަކަށްއައިސް ރާއްޖެއަށް ޕޯސްޓު މެދުވެރިކޮށް އެތެރެކުރާ މަސްތުވާތަކެތީގެ ޢަދަދުވަނީ ނިސްބަތުން އިތުރުވެފައެވެ.