ކޮންޑަމްގައި ޖަލަށް މަސްތުވާތަކެތި އެތެރެކުރި އަންހެނެއްގެ މައްސަލަ ބަލަން ހައިކޯޓުން އަމުރުކޮށްފިއެވެ.

2018 ވަނަ އަހަރު މާފުށީ ޖަލަށް ދިޔަ އަންހެނަކު، އޭނާގެ ދަށުންލާއެއްޗެތީގެ ތެރޭގައި 2 ކޮންޑަމަށް އަޅައި ފޮރުވައިގެން މަސްތުވާތަކެތި އެތެރެކުރި މައްސަލައެއް ކްރިމިނަލް ކޯޓުންވަނީ ބަލާފައެވެ. އޭނާ ޖަލަށް ގޮސްފައިވަނީ ޙުކުމް ތަންފީޒު ކުރަމުންދިޔަ ފިރިމީހާއާއި ބައްދަލު ކުރުމަށެވެ.

މި މައްސަލައިގައި ކްރިމިނަލް ކޯޓުން 2019 ވަނަ އަހަރުގެ ސެޕްޓެމްބަރު މަހު ހުކުމްކޮށްފައިވަނީ އެ އަންހެން މީހާގެ މައްޗަށް ކުށް ސާބިތު ނުވާ ކަމަށެވެ. އޭނާގެ މައްޗަށް ދައުވާ ސާބިތުނުވީ އަންހެނަކު ބަލައި ފާސްކުރަން ވާނީ އަންހެން ފުލުހެއް ކަމަށް ޖިނާއީ އިޖުރާއަތުގެ ގާނޫނުގައިވާތީ އޭނާ ބަލައިބާސްކުރުމުގައި ފުލުހުން ގާނޫނާއި ހިލާފުވި ކަމަށް ބުނެއެވެ.

ކްރިމިނަލް ކޯޓުން އެ އަންހެން މީހާގެ މައްޗަށް ކުށް ސާބިތު ނުވުމުން ދައުލަތުން އެ މައްސަލަ ހައިކޯޓުގައި އިސްތިއުނާފު ކުރިއެވެ. ހައިކޯޓުންވަނީ މިމައްސަލަ އަކީ މައުޟޫއީ ގޮތުން ބަލައި ގޮތެއް ނިންމަން ޖެހޭ މައްސަލައެއް ކަމަށް ފެންނާތީ ދަށު ކޯޓުގެ ހުކުމް ބާތިލުކޮށް، ކްރިމިނަލް ކޯޓުން އަލުން އެ މައްސަލަ ބަލަން އަމުރުކޮށްފައެވެ.

ހައިކޯޓުގެ ޙުކުމުގައި ވަނީ އަންހެން ފުލުހަކު ނެތް ހާލަތެއްގައި ޑިއުޓީ އިންޗާޖް އަންގާ ކޮންމެ އަންހެނަކަށް ވެސް އަންހެނަކު ފާސްކުރެވިދާނެ ކަމަށް ފުލުހުންގެ ބާރުތައް ބަޔާންކޮށްފައިިވާ ގަވައިދުގައި އެބައޮތް ކަމަށެވެ. އަދި ޖަލަށް ވަންނަ މީހުން ފާސްކުރުމުގެ ބާރު ކަރެކްޝަނަލް ސާވިސްގެ އޮފިސަރުންނަށް ވެސް ލިބިފައިވުމާއެކު ކަރެކްޝަނަލް ސާވިސްގެ އޮފިސަރުން މެދުވެރިކޮށް ނޫރާ މޫސާގެ ހަށިގަނޑު ބަލައި ފާސްކުރުމަކީ ޖިނާއީ އިޖުރާއަތުގެ ގާނޫނާއި ހިލާފު ކަމެއް ނޫން ކަމަށް ހައިކޯޓުން ވަނީ ކަނޑައަޅާފައެވެ.

ހައިކޯޓުގެ ތިން ފަނޑިޔާރުންގެ އިއްތިފާޤުން ނިންމާފައިވާ މި މައްސަލަ ބެއްލެވީ ފަނޑިޔާރު ހުޒައިފާ މުހައްމަދާއި، މުހައްމަދު ނިޔާޒް އަދި ހުސެއިން ޝަހީދުއެވެ.