އެލްޖީއޭ އަކީ ކައުންސިލްތަކުގެ އެހީތެރިއެއްކަމަށް ލޯކަލް ގަވަރމަންޓް އޮތޯރިޓީ، އެލްޖީއޭގެ ސީއީއޯ ފާތިމަތު އަފްޝަން ލަތީފް ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އިސްނެންގެވުމުގެ މަތިން އިންތިޒާމުކޮށް މިއަދު ލ. އަތޮޅުގައި ފެށި ތިންވަނަ ވިއަވަތި ރާއްޖެ ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން އަފްޝަން ވިދާޅުވީ ގާނޫނުން އެލްޖީއަށް މަތިކޮށްފައިވަނީ ކައުންސިލްތަކުގެ ޒިންމާ އަދާކުރޭތޯ ބެލުންކަމަށެވެ. އެހެންކަމުން އެލްޖީއޭއަކީ ކައުންސިލްތަކުގެ ބެލެނިވެރި ފަރާތުގެ ގޮތުގައި ސިފަ ކުރުމަކީ އެދިލައްވާގޮތްނޫން ކަމަށް އަފްޝަން ވިދާޅުވިއެވެ.

އަފްޝަން ވިދާޅުވީ، އެލްޖީއޭއިން ކުރާކަމަކީ ކައުންސިލްތަކަށް އެހީތެރިކަން ފޯރުކޮށްދިނުން ކަމަށެވެ. އެހެންކަމުން އެލްޖީއޭއާ މެދު ކައުންސިލްތަކުން ދެކޭގޮތް ބަދަލުކުރުމަކީ މުހިއްމު ކަމެއްކަން އަފްޝަން ފާހަގަކުރެއްވިއެވެ.

"އަޅުގަނޑުމެން އަޑު އަހަމު، ރަނގަޅު އެކުވެރިންނަކީ ރަނގަޅު ކަންކަމަށް ހިތްވަރުދީ އެކަންކަމުގައި އެހީތެރިވާ ބައެކޭ. އަދި ނުރަނގަޅު މަގަކުން ދާނަމަ އެ ކަމުން ދުރުކުރާނެ ބައެކޭ. އެލްޖީއޭއަކީ ކައުންސިލްތަކުގެ އެކުވެރިއެއް އަދި އެހީތެރިއެއް،" އަފްޝަން މިއަދު ވިދާޅުވިއެވެ.

ވިއަވަތި ކޮންފަރެންސްގައި އަފްޝަން އިތުރަށް ވިދާޅުވީ އެލްޖީއޭ އިން ކުރާކަމަކީ ކައުންސިލްތަކުގެ ކުށްހޯދައި ފިޔަވަޅުއެޅުން ނޫން ކަމަށެވެ. އެހެންނަމަވެސް އެލްޖީއޭ އަކީ ގޯހުން ކަމެއްދާނަމަ އެކަން ރަނގަޅު ކުރުމަށް ލަފައާއި އިރުޝާދު ދޭ އެކުވެރިއެއް ކަމަށާއި، އަދި ރަނގަޅުކުރުމަށް ބޭނުންވާ އެހީތެރިކަމަކީ ކޮބައިތޯ ބަލައި އެކަމަށް ޖާގައާއި ފުރުސަތު ހޯދައިދޭ އެހީތެރިއެއް ކަމަށެވެ.

އޭގެ އިތުރުން އަފްޝަން ވަނީ އެލްޖީއޭއިން ފާއިތުވީ މުއްދަތުގައި ކައުންސިލްތަކަށް އެހީތެރިކަން ފޯރުކޮށްދިނުމަށް ކުރިއަށް ގެންދެވި ޕްރޮގްރާމްތަކުގެ ތަފާސްހިސާބުވެސް ޙިއްސާކުރަށްވާފައެވެ.