ޓެރަރިޒަމްގެ ހަމަލާއެއް ދޭން އުޅޭކަމުގެ ތުހުމަތަށް ތ. ތިމަރަފުށިން ހައްޔަރުކުރި މީހުންގެ ތެރޭގައި ހިމެނޭ އެރަށު ކެނެރީގެ އަލީ މުނީޒް 100 ދުވަހަށް ގެއަށް ބަދަލުކުރުމަށް ކްރިމިނަލް ކޯޓުން ނިންމައިފިއެވެ.

ކްރިމިނަލް ކޯޓުގައި މިއަދު ކުރިއަށް ގެންދިޔަ އަލީ މުނީޒްގެ ބަންދު މުރާޖަޢާ އަޑުއެހުމުގައި ޤާޟީވަނީ ޝަރުތުތަކަކާއެކު ބޭސްފަރުވާގެ ބޭނުމަށް އޭނާ ގެއަށް ބަދަލުކުރުމަށް އަންގަވާފައެވެ.

މިއަދުގެ އަޑުއެހުމަކީ ދަޢުލަތުން އެދިގެން ކުރިއަށް ގެންދިޔަ އަޑުއެހުމެކެވެ. އެގޮތުން ދަޢުލަތުން އެދިފައިވަނީ 100 ދުވަހަށް އޭނާ ގެއަށް ބަދަލުކޮށްދިނުމަށެވެ.

މުނީޒު ގެއަށް ބަދަލުކޮށްފައިވަނީ 8 ޝަރުތެއް ކުރުމަށްފަހުއެވެ. އޭގެ ތެރޭގައި ޤާނޫނާ ޚިލާފު އެއްވެސް ކަމެއް ނުކުރުމާއި، ކޯޓަށް ހާޒިރުވާން ޖެހޭ ގަޑިއަށް ހާޒިރުވުމާއި، ރޭގަނޑު 6 އިން ހެނދުނު 8 އަށް ސިއްޙީ ފަރުވާނޫން އިތުރު ކަމެއްގައި ބޭރަށް ނުދިއުމާއި، ޕީޖީ އޮފީހުގެ ހުއްދަ ނެތި މާލެ ސަރަޙައްދުން ބޭރަށް ނުދިއުން ހިމެނެއެވެ.

އޭގެ އިތުރުން ކުށްތަކުގެ ތުހުމަތުވާ މީހުންނާއި، މައްސަލައިގެ ހެކިބަސް ދޭ މީހުންނާ ބައްދަލު ނުކުރުމާއި، އޭނާގެ ސިއްޙީ މައްސަލަތަކަށް ފަރުވާ ހޯދަމުންދާ ކަމުގެ ލިއުންތައް ކޮންމެ 15 ދުވަހަކުން ޕީޖީ އޮފީހާއި ކޯޓަށް ހުށައަޅަމުން ދިއުމާއި، ފުލުހުން އަންގާ ގޮތެއްގެ މަތިން ހާޒިރުވެ، ސޮއި ކުރަންޖެހޭ އެއްޗެއްގައި ސޮއި ކުރުން ހިމެނެއެވެ.

އަލީ މުނީޒުގެ މައްޗަށް ދައުލަތުން އުފުލާފައިވަނީ ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާ އާއި ޓެރަރިޒަމްގެ އަމަލެއް ކުރުމަށް ބޭނުންވާ އުކުޅުތައް ދަސްކުރުމުގެ ކުށުގެ ދައުވާގެ އިތުރުން ޓެރަރިސްޓް ޖަމާއަތަކަށް ތާއީދުކުރާ މީހެއް ކަމަށް ދޭހަވާ ފަދަ ލިޔުމެއް ގެންގުޅުމުގެ ކުށުގެ ދައުވާ އެވެ.