މޯލްޑިވްސް މީޑިއާ ކައުންސިލްގެ މެންބަރުކަމަށް ކުރިމަތިލުމުގެ މުއްދަތު އިތުރުކޮށްފި އެވެ.

އެމްއެމްސީގެ މެންބަރުކަމަށް ކުރިމަތިލުމުގެ ފުރުސަތު ހުޅުވާލީ މިމަހުގެ ފަސްވަނަ ދުވަހު އެވެ. އެ އިއުލާނުގައި މެންބަރުކަމަށް ކުރިމަތިލުމުގެ މުއްދަތު ހަމަވާ ތާރީޚެއްކަމަށް ބުނެފައިވަނީ މި މަހުގެ 14 ވަނަ ދުވަހެވެ.

ދާޚިލީ ވުޒާރާއިން މިއަދު ބުނީ އެމްއެމްސީގެ މެންބަރުކަމަށް ކުރިމަތިލުމުގެ މުއްދަތު މި މަހުގެ 26 ވަނަ ދުވަހުގެ ނިޔަލަށް އިތުރުކޮށްފައިވާ ކަމަށެވެ. ވިދިވިދިގެން ދެ ދައުރަށް އެއް ބަޔަކު ކުރިމަތިލުމުގެ ފުރުސަތު ނުއޮންނަ އެކައުންސިލްގެ ދައުރެއްގެ ދިގުމިނަކީ ދެއަހަރު ދުވަހެވެ.

13 މެމްބަރުން ތިއްބަވާ މީޑިއާ ކައުންސިލްގައި މީޑިއާތަކުން އިންތިހާބުކުރާ ހަތް މެމްބަރުންނާއި އާއްމުންގެ ފަރާތުން ހަ މެމްބަރުން ތިއްބަވާނެއެވެ.

ދާޚިލީ ވުޒާރާގެ އިޢުލާނުގައި އިތުރަށް ބުނެފައިވަނީ މިމަހުގެ ފަސްވަނަ ދުވަހު ކޮށްފައިވާ އިއުލާނުގެ ދަށުން މެންބަރުކަމަށް އެދި ހުށަހެޅި ފަރާތްތަކުން އަލުން ފޯމް ހުށަހަޅަން ނުޖެހޭނެ ކަމަށެވެ.