ގދ. ތިނަދޫ ކައުންސިލަށް ލިބެން ޖެހޭ 4.7 މިލިއަން ރުފިޔާ ނުލިބިގެން އެ މައްސަލަތައް ކޯޓަށް ހުށައެޅުމަށް އެރަށު ކައުންސިލުން ނިންމައިފިއެވެ.

ތިނަދޫ ކައުންސިލުން މިއަދު ބުނީ، ތިނަދޫގެ އިހުތިސާސް ހިނގާ ސަރަހައްދުން އިޤްތިޞާދީ ބޭނުމަށް ދޫކޮށްފައިވާ ކުލީ ބިންތަކުގެ ތެރެއިން ބައެއް ބިންތަކަށް ދައްކަންޖެހޭ ގިނަ އަދަދެއްގެ ކުއްޔާއި ޖޫރިމަނާ ނުދައްކާ އެބަހުރި ކަމަށެވެ. އެގޮތުން ވަކި ފަރާތަކަށް ނިސްބަތްވާ ގިނަ ބިންތަކުގެ ކުލި ނުލިބިވާ ކަމަށާއި އެ ބިންތަކުގެ ކުލީގެ ޖުމްލަ މިލިއަނަކަށް ވުރެ މަތި ކަމަށް ވެސް ކައުންސިލުން ވަނީ ބުނެފައެވެ.

ކައުންސިލުން ބުނީ ކުލި ނުދެއްކުމުގެ ސަބަބުން ތިނަދޫ ރައްޔިތުންގެ މާލިއްޔާއަށް، މިދިޔަ މަހު މަހުގެ ނިޔަލަށް ޖުމްލަ 4.7 މިލިއަނަށް ވުރެ ގިނަ ރުފިޔާ ލިބިފައިނުވާ ކަމަށެވެ. އޭގެ އިތުރުން ބިންތަކުގެ ކުލި ހަލާސްނުކޮށް، ބިންތަކުގެ މުއްދަތު އާކުރުމަށް ވެސް ބައެއް ފަރާތްތަކުން ހުށައަޅަމުންދާ ކަމަށާއި، އެއީ ވަރަށް ކަންބޮޑުވާ ކަމެއް ކަމަށް ކައުންސިލްގެ އިޢުލާނުގައިވެއެވެ.

ކައުންސިލުން ބުނީ، ކުލި ނުދައްކާ ބިންތަކަށް މިދިޔަ އަހަރުގެ މެއި މަހު ނުވަޔަކުން ފެށިގެން ބައިބަޔަށް ބަހާލައިގެން ކުލި ދެއްކޭނެ އިންތިޒާމު ހަމަޖައްސައިދިން ކަމަށާއި ނަމަވެސް އެކަމަށްވެސް ބިންތައް ކުއްޔަށް ނަންގަވާފައިވާ ބައެއް ފަރާތްތަކުން އެއްބާރުލުން ދެއްވާފައި ނުވާ ކަމަށެވެ.

އެހެންކަމުން ތިނަދޫ ރައްޔިތުންނަށް ލިބެންޖެހޭ ކުލީގެ ފައިސާ ހޯދުމަށް ޝަރުއީ މަރުހަލާތަކަށް ފޮނުވުމަށާއި، ކުލިނުދައްކާ ބިންތަކާ މެދު ގާނޫނީ ގޮތުން ފިޔަވަޅު އެޅުމަށް ނިންމާފައިވާކަމަށް ކައުންސިލުން ވަނީ ހާމަކޮށްފައެވެ.