ސްރީ ލަންކާ ސިފައިންގެ ޔުނީފޯމުގެ ބައިތައް އެކި އެކި ފަހަރުމަތިން ގަންނަމުންދާ ދިވެއްސެއްގެ މައްސަލަ ދަ ކޮލޮމްބޯ ކްރައިމް ޑިވިސަން، ސީސީޑީއިން ބަލަން ފަށައިފިއެވެ.

ސީސީޑީއާއި ހަވާލާދީ ޑެއިލީ ނިއުސް ގައި ރިޕޯޓްކޮށްފައިވާ ގޮތުގައި މިމައްސަލަ ސީސީޑީގެ ސަމާލުކަމަށް އައީ ދިވެއްސަކު މަހަކު ދެކޮޅު ލަންކާއަށް ގޮސް އެޤައުމުގެ ސިފައިން ބޭނުންކުރާ ޔުނީފޯމްގެ ބައިތައް ގަންނަކަމުގެ ރިޕޯޓެއް ލިބުމާއި ގުޅިގެންނެވެ.

މި މައްސަލަ ތަޙުޤީޤު ކުރަމުން ގެންދާކަން ސީޑީސީން އެޤައުމުގެ މެޖިސްޓްރޭޓް ކޯޓަކަށް އިއްޔެވަނީ ހުށައަޅާފައެވެ. އަދި އެކަމަށް ބޭނުންވާ ކޯޓު އަމުރު ލަންކާގެ އެޑިޝަނަލް މެޖިސްޓްރޭޓް ޓީ.އެން.އެލް މަހަވައްޓަ މިހާރުވަނީ ސީޑީސީއަށް ދީފައެވެ.

ސީޑީސީން ވަނީ މިކަމަކީ ނުރައްކާތެރި ޓެރަރިޒަމްގެ ޢަމަލަކަށް ތައްޔާރުވުމަށް ހިންގާ ކަމަކަށް ވެދާނެކަމަށް ތުހުމަތުކޮށްފައެވެ.

މިމައުލޫމާތު ސީޑީސީއަށް ފޯރުކޮށްދީފައިވާ ލަންކާގެ ވިޔަފާރިވެރިއަކު ބުނެފައިވަނީ އެ ދިވެހިމީހާ ކޮންމެ މަހެއްގެ ދެކޮޅު ލަންކާއަށްގޮސް އެ ތަކެތި ގަންނަކަން އެނގިފައިވާކަމަށާއި، އަދި އެތަކެތި ގަންނަނީ ސްކޫލު ހަރަކާތްތަކަކަށް ކަމަށް ބުނާކަމަށެވެ.

ދިވެހި މީހާ ގަނެފައިވާ ތަކެތީގެ ތެރޭގައި ލަންކާ ސިފައިން އަރާފަދަ ބޫޓާއި ބެލްޓާއި ޔުނީފޯމުގެ ބައިތަކާއި ލަންކާ ސިފައިންގެ ލޯގޯ ޖެހި ބައެއް އާލާތްތައް ހިމެނެއެވެ.