ކްރިސްޓަލް އެންޓަޓެއިންމަންޓުން ގެނެސްދޭ އައު ފިލްމު "މަޖުނޫން" ބޮޑު ސްކްރީނުން ބަލަން ބޭނުންވާނަމަ، ލަސްނުކޮށް މިހާރުން މިހާރަށް ޓިކެޓު ގަތުމަށް ފިލްމުގެ ޕްރޮޑިއުސަރު އަދި ޑައިރެކްޓަރު ފާތިމަތު ނަހުލާ (ނަހޫ) އެދިއްޖެއެވެ.

ނަހުލާ މިހެން ބުނީ މި ފަހަރު އޮލިމްޕަސް ސިނަމާ ލިބިފައިވަނީ ވަރަށް މަދު ދުވަސްކޮޅަކަށް ކަމަށް ވާތީއެވެ. އެގޮތުން މި ފިލްމަށް އޮލިމްޕަސް ލިބިފައިވަނީ އެންމެ 30 ދުވަހަށެވެ. މީގެ ކުރިން ނަހުލާ ގެނެސްދިން ފިލްމުތަކުގެ ތެރެއިން އެންމެ މަދުން ދެއްކި ފިލްމުގެ ވެސް 33 ޝޯ ހައުސްފުލް ވެފައިވާއިރު، އެންމެ ފަހުން އޭނާ ގެނެސްދިން ފިލްމު "ސޮރީ" ގެ 50 ޝޯ ވަނީ 100 ޕަސެންޓް ހައުސްފުލްކޮށް ދައްކާފައެވެ. އަދި "ސޮރީ" ދެއްކުން ނިންމާލަން ޖެހުނީ ވެސް ބެލުންތެރިން ބަލަން އެދިއެދި ތިއްބާ، އޮލިމްޕަހުން އިތުރު ތާރީޚުތައް ނުލިބިގެންނެވެ.

"އެހެންވީމާ މިފަހަރު ސްކްރީނުން ބަލަން ބޭނުމިއްޔާ އަވަހަށް ޓިކެޓު ނަގަން ޖެހޭނީ. އެއީ ދެވަނަ ފަހަރަށް ދެއްކުމުގެ ފުރުސަތުވެސް މިހާރު ނޯވޭ، އޮލިމްޕަސް ބިޒީކަމުން،" ނަހުލާ ބުންޏެވެ.

ނަހުލާ އިތުރަށް ފާހަގަކުރި ގޮތުގައި ފިލްމު "ސޮރީ" އެޅުވި އިރު، ޑިމާންޑު ބޮޑުވެގެން ތިން ފަހަރެއްގެ މަތިން އޮލިމްޕަހުގެ ތާރީޚުތައް އިތުރުކުރަން ޖެހުނު ނަމަވެސް، މިފަހަރު ފުލުފުލުގައި އެހެން ފިލްމުތައް ހުރުމުން އެ ފުރުސަތުވެސް ނޯންނާނެއެވެ.

އަސަރުގަދަ އަދި ފުން ލޯބީގެ ވާހަކައެއްގެ މައްޗަށް ބިނާކޮށް އުފައްދާފައިވާ "މަޖުނޫން" ގެ ޓިކެޓު މިދިޔަ މަހުގެ 28 އިން ފެށިގެން ދަނީ ވިއްކަމުންނެވެ. އެގޮތުން އޮލިމްޕަސް ކައުންޓަރުގެ އިތުރުން 7844422 އަށް މެސެޖުކޮށްގެން އޮންލައިންކޮށް ފައިސާ ދައްކައިގެން ވެސް ޓިކެޓު ނެގޭނެ އިންތިޒާމު ވަނީ ހަމަޖައްސާފައެވެ.

ގިނަ ބަޔަކު ކެތްތެރިކަމެއް ނެތި އިންތިޒާރު ކުރަމުން އަންނަ މި ފިލްމު އޮލިމްޕަހުގެ ބޮޑު ސްކްރީނުގައި ރަސްމީކޮށް އަޅުވަން ހަމަޖެހިފައިވަނީ މިމަހުގެ 26 ވަނަ ދުވަހުއެވެ.