ށ. މަރޮށީ ޞިއްޙީ މަރުކަޒުން ދެމުން އައި 16 ގަޑިއިރުގެ ޚިދުމަތް 24 ގަޑިއިރަށް ބަދަލުކޮށް، އެ ރަށުގައި އަސާސީ ލެބޯޓްރީގެ ޚިދުމަތް ރަސްމީކޮށް ދޭން ފަށައިފިއެވެ.

އިއްޔެ ބޭއްވި ޚާއްޞަ ރަސްމިއްޔާތެއްގައި މި ޚިދުމަތްތައް ރަސްމީކޮށް ފައްޓަވައިދެއްވީ ޞިއްޙަތާއި ޢާއިލާއާއި އިޖްތިމާޢީ އެހީއާ ބެހޭ ވަޒީރު ޤީލާ ޢަލީއެވެ.

މި ރަސްމިއްޔާތުގައި ޞިއްޙީ ވުޒާރާގެ އިސްވެރިންގެ އިތުރުން މަރޮށީ ކައުންސިލާއި ޞިއްޙީ މަރުކަޒުގެ އިސްމަސްއޫލުވެރިން ބައިވެރިވެވަޑައިގެންނެވިއެވެ.

މީގެ ކުރިން މަރޮށީގައި ލެބޯޓްރީގެ ޚިދުމަތް ނެތުމުގެ ސަބަބުން ކުޑަ ޓެސްޓެއް ހަދަން ޖެހުނު ކަމުގައި ވިޔަސް، އެ ރަށުގެ ރައްޔިތުންނަށް މަޖުބޫރުވަނީ އެހެން ރަށަކަށް ދަތުރުކުރާށެވެ.

މީގެ ސަބަބުން ދަތުރުފަތުރަށް ބޮޑެތި ޚަރަދުތަކެއް ކުރަންޖެހި، ޚާއްޞަކޮށް ގަދަ ކަނޑުގައި ކުޑަކުދިންނާއި ޢުމުރުން ދުވަސްވީ މީހުން ގޮވައިގެން ދަތުރުކުރުމުގައި ނުހަނު ބޮޑެތި ތަކުލީފުތަކާ ކުރިމަތިލާންޖެހުނެވެ.

ނަމަވެސް، އަލަށް ފެށުނު ޚިދުމަތްތަކާއެކު މިހާރު އަމިއްލަ ރަށުގައި ތިބެގެން ލޭ އެޅުމާއި އަސާސީ އެކި ޓެސްޓުތައް ހެދޭނެ އިންތިޒާމު ވަނީ ފަހިވެފައެވެ.

މިއީ ސިއްހީ ފަރުވާއަށް އެހެން ރަށްރަށަށް ކުރަންޖެހޭ ދަތުރުތައް މަދުވެ، ރައްޔިތުންގެ ޖީބަށް ބޮޑު ލުޔެއް ލިބުމުގެ އިތުރުން ރަށުގެ ރައްޔިތުންނަށް ލިބިގެންދިޔަު ނުހަނު ބޮޑު އުފަލަކާއި ތަސައްލީއެކެވެ.

ޞިއްޙީ ދާއިރާގެ ވަފުދުން މި ސަރަޙައްދަށް ކުރެއްވި މި ދަތުރުފުޅުގައި މަރޮށީގެ އިތުރުން، އެ އަތޮޅު ޅައިމަގުގައިވެސް ވަނީ ލެބޯޓްރީގެ ޚިދުމަތް ރަސްމީކޮށް ފައްޓަވައިދެއްވާފައެވެ.