ދިވެހި ސިނަމާގައި ބޮޑު މަޤްބޫލުކަމެއް ހޯދާފައިވާ ޑައިރެކްޓަރު ފާތިމަތު ނަހުލާ (ނަހޫ) ގެ އައު ފިލްމު "މަޖުނޫން" ގެ މެއިން ސްޕޮންސަރަކަށް މަޝްހޫރު ފަރުނީޗަރު ބްރޭންޑް އެވޯން ހަމަޖައްސައިފިއެވެ.

ފަހަކަށް އައިސް ދިވެހި ގިނަ ފިލްމުތަކެއް ސްޕޮންސަރ ކުރަމުން އަންނަ އެވޯން އަކީ، މިދިޔަ އަހަރު ނަހުލާ ގެނެސްދިން ކާމިޔާބު ފިލްމު "ސޮރީ" ގެ ވެސް މެއިން ސްޕޮންސަރެވެ.

މިފަހަރު އެވޯން އިން ވަނީ ފިލްމު ބަލަންދާ ފަރާތްތަކަށް ހާއްސަ އަގުހުރި އިނާމެއް ހުށަހަޅާފައެވެ. އެގޮތުން، "މަޖުނޫން" ފިލްމު ބެލުމަށް ޓިކެޓު ބައްލަވައިގަންނަވާ ފަރާތްތަކުގެ މެދުގައި ނެގޭ ހާއްސަ ގުރުއަތަކުން ހޮވޭ ނަސީބުވެރިއަކަށް 5 ފޫޓުގެ އެނދެއް ގޮދަޑިއާއެކު ދިނުމަށް އެވޯން އިން ވަނީ ނިންމާފައެވެ.

މި ލަކީޑްރޯ ނެގުމަށް ހަމަޖެހިފައިވަނީ ފިލްމު ބެލުމަށް ޓިކެޓު ބައްލަވައިގަންނަވާ ހުރިހާ ފަރާތްތަކުގެ މެދުގައެވެ. އެގޮތުން މާލެ ސަރަހައްދާއި އަތޮޅުތެރެ ހިމެނޭހެން، ފިލްމުގެ ޓިކެޓު ނަގާ ކޮންމެ މީހަކަށްވެސް މި ގުރުއަތުގައި ބައިވެރިވުމުގެ ފުރުސަތު ލިބިގެންދާނެއެވެ.

ކްރިސްޓަލް އެންޓަޓެއިންމަންޓުން ގެނެސްދޭ "މަޖުނޫން" އަކީ އަސަރުގަދަ އަދި ފުން ލޯބީގެ ވާހަކައެއްގެ މައްޗަށް ބިނާކޮށް އުފައްދާފައިވާ ފިލްމެކެވެ. ބެލުންތެރިންގެ މިހާރުވެސް ވަރަށް ބޮޑަށް އިންތިޒާރު ކުރަމުންދާ މި ފިލްމުގެ ޓިކެޓު މި މަހުގެ 28 ވަނަ ދުވަހުން ފެށިގެން ވަނީ ރަސްމީކޮށް ވިއްކަން ފަށާފައެވެ.

ފިލްމުގެ ޓިކެޓު ގަންނަން ބޭނުންވާ ފަރާތްތަކަށް އޮލިމްޕަހުގެ ކައުންޓަރުން ޓިކެޓު ލިބެން ހުންނާނެއެވެ. އަދި އޮންލައިންކޮށް ފައިސާ ދައްކައިގެން ޓިކެޓު ނަގަން ބޭނުންވާ ފަރާތްތަކަށް 7844422 ނަންބަރަށް މެސެޖުކުރުމުން އެ އިންތިޒާމު ހަމަޖެހިގެންދާނެއެވެ. އޮންލައިންކޮށް ފައިސާ ދައްކާ ފަރާތްތަކުގެ ޓިކެޓުތައް ވަކި މުއްދަތެއް ވަންދެން އޮލިމްޕަސް ކައުންޓަރުގައި ބަހައްޓައިދޭނެ ކަމަށް ވެސް ޕްރޮޑަކްޝަން ޓީމުން ބުނެއެވެ.

ގިނަ ބަޔަކު އިންތިޒާރު ކުރަމުން އަންނަ "މަޖުނޫން" ރަސްމީކޮށް އޮލިމްޕަހުގެ ބޮޑު ސްކްރީނުގައި އަޅުވަން ހަމަޖެހިފައިވަނީ އަންނަ އޮކްޓޯބަރު މަހުގެ 26 ވަނަ ދުވަހުއެވެ.