ބަންޑާރަ ނާއިބު ނުހިމަނައި ބާ ކައުންސިލްގެ އެގްޒެކެޓިވް ކޮމިޓީގެ އެކުލަވާލާ ގޮތަށް ގާނޫނަށް އިސްލާހު ގެނައުމަށް ރަައްޔިތުންގެ މަޖިލީހަށް ހުށަހަޅައިފިއެވެ.

މި އިސްލާހު މިއަދު މަޖިލީހަށް ހުށަހަޅާފައި ވަނީ ސަރުކާރުގެ ފަރާތުން، ހުޅުމާލޭ އުތުރު ދާއިރާގެ މެމްބަރު ހުސައިން ޝަރީފެވެ.

ބިލުގައި ވާގޮތުން، ބާ ކައުންސިލްގައި ބަންޑާރަ ނާއިބު ނުހިމަނާގޮތަށް އުސޫލު ބަދަލު ކުރަން ނިންމީ، ބާ ކައުންސިލަކީ ފުރިހަމަ މިނިވަންކަން ލިބިފައިވާ ކައުންސިލަކަށް ހެދުމުގެ ބޭނުމުގައެވެ.

އެހެންކަމުން އިސްލާހުގައި ވަނީ ބަންޑާރަ ނާިބުގެ މަގާމުގައި ހުންނަ މީހަކު ބާ ކައުންސިލްގެ މެމްބަރެއްގެ ގޮތުގައި ކަނޑައަޅާފައި އޮތް އޮތުން ގާނޫނުން އުނި ކުރުމާއި، ބާ ކައުންސިލަށް ހަތް ވަކީލުން އިންތިހާބު ކުރާ ގޮތަށް ގާނޫނު ބަދަލު ކުރުމަށެވެ.

މި ބިލުގެ މަގުސަދަކީ، ބާ ކައުންސިލަކީ ގާނޫނީ ވަކީލުންގެ ފަރާތުން އެމީހުން އިންތިހާބުކުރާ މަންދޫބުންގެ މައްޗަށް އެކުލެވިގެންވާ ކައުންސިލަކަށް ހެދުން ކަމަށް ބިލުގައި ބުނެފައިވެއެވެ.