ބޮލީވުޑުގެ މަޝްހޫރު ފިލްމު އުފެއްދުންތެރިޔާ މަހޭޝް ބަޓް ފިލްމު ޑައިރެކްޓު ކުރުން ހުއްޓާލަން އުޅޭ ކަމަށް ބުނެފިއެވެ.

ދާދި ފަހުން އިންޑިއަން އެކްސްޕްރެސް އަށް ދިން އިންޓަވިއުއެއްގައި މަހޭޝް ބަޓް ވަނީ ފިލްމު ޑައިރެކްޓު ކުރުން ހުއްޓާލަން އުޅޭ ކަމަށް ބުނެފައެވެ. އެގޮތުން މަހޭޝް ބަޓް ބުނެފައިވަނީ އޭނާ ދެކޭ ގޮތުގައި މިހާރު އޭނާގެ ހިޔާލުތައް "އައުޓްޑޭޓް" ވެފައިވާ ކަމަށާއި، އެހެންވެ އޭނާ ވަރަށް އަވަހަށް ފިލްމު ޑައިރެކްޓު ކުރުން ހުއްޓާލާނެ ކަމަށެވެ.

މަހޭޝް ބަޓް ބުނެފައިވަނީ މީހުން ނުވަތަ ކެރެކްޓަރުތައް އުފެއްދުމަށްވުރެ އޭނާ އުފާވާ އިތުރު ކަމެއް ނެތްކަމަށާއި، އޭނާއަށް އެ ފުރުސަތު ހޯދަދީފައިވަނީ ވިކްރަމް ބަޓް ކަމަށެވެ. އަދި އޭގެ ސަބަބުން އެތައް މޮޅެތި ކެރެކްޓާތަކެއް އުފައްދައި އެތައް ބަޔަކަށް ކުރިއެރުން ހޯދައި ދިނުމުގެ ފުރުސަތު އޭނާއަށް ލިބިފައިވާ ކަމަށްވެސް މަހޭޝް ބަޓް ވަނީ ބުނެފައެވެ.

އޭނާ ބުނެފައިވަނީ އޭނާ ޑައިރެކްޓު ކުރުމާ ދުރުވާން ވީ ވަގުތު މިހާރު އައިސް ޖެހިފައިވާ ކަމަށާއި، މިކަން ކުރުމަށް އެހާ ފޯރިއެއް އަދި ޖޯޝެއް އޭނާގެ ކިބައިގައި ނުހުންނަ ކަމަށެވެ. އަދި މިހާރު މިކަން އެންމެ ފުރިހަމައަށް ކުރުމުގެ ޖޯޝު ފެނިގެންދަނީ ވިކްރަމް އާއި އަވިކާ ގޯރު ފަދަ މީހުންގެ ފަރާތުން ކަމަށްވެސް މަހޭޝް ވަނީ މި އިންޓަވިއުގައި ބުނެފައެވެ.

މަހޭޝް ބަޓް އެންމެ ފަހުން ޑައިރެކްޓު ކޮށްފައިވާ ފިލްމު "ބްލަޑީ އިޝްގު" އަށް އީ ޓައިމްސް އިން ދީފައިވަނީ ވަރަށް ދައް ރޭޓިން އެކެވެ. އެގޮތުން އީ ޓައިމްސް އިން މި ފިލްމަށް 2/5 ގެ ރޭޓިން އެއް ދީފައިވާއިރު، ފިލްމުގެ ރިވިއުގައި ބުނެފައިވަނީ ފިލްމު އުފައްދާފައިވަނީ ވަރަށް ލަފާކުރެވޭ ފަދަ ގޮތަކަށް ކަމަށާއި މި ފިލްމުގައި "ވާއު" ފެކްޓަރެއް ނުވަތަ މީހުން އާޝޯހުވާ ފަދަ ކަމެއް ނެތް ކަމަށެވެ. އަދި މި ފިލްމަކީ ފިލްމުގެ ޖޯންރާއަށް ވެސް ނުފެތޭ ފިލްމެއް ކަމަށް އެ ރިވިއުގައި ވެއެވެ.

އިންޑިއާގެ ސިނަމާތަކަށް މަހޭޝް ބަޓް ވަނީ އެތައް ހިދުމަތްތަކެއް ކޮށްދީފައެވެ. އެގޮތުން ޑައިރެކްޓަރެއްގެ ހައިސިއްޔަތުން 50 އަށް ވުރެ ގިނަ ފިލްމު ޑައިރެކްޓު ކޮށްފައިވާއިރު، އޭނާ ވަނީ ހިންދީ ސިނެމާ ބައްޓަން ކުރުމުގައި ވަރަށް މުހިންމު ރޯލުތަކެއް އަދާކޮށްފައެވެ.