ކާއެއްޗެހި ތައްޔާރުކުރާއިރު ބޭނުންކުރާ ގިނަ ބާވަތްތަކަކީ އެއިން ކާތަކެތީގެ ރަހަ ރަނގަޅުވުމުގެ އިތުރުން ވެސް ގިނަ ބޭނުންތަކެއް ހިފޭ ބާވަތް ތަކެވެ. އެގޮތުން ކާއެއްޗެހީގެ ރަހަ މީރު ކުރުމަށް ބޭނުންކުރާ ރޯޒްމެރީއަކީ ހުޅުތަކުގައި ރިއްސުމަށް ފަރުވާ ކުރުމަށް ބޭނުން ކުރެވޭނެ ބާވަތެކެވެ.

ހުޅުހުޅުގައި ރިއްސުމަކީ ވަރަށް ގިނަ ބަޔަކު ތަހައްމަލު ކުރަމުންދާ ވޭނެކެވެ. އަދި މިކަމުގެ ސަބަބުން މިކަން ތަހައްމަލު ކުރާ ފަރާތްތަކަށް އެމީހުންގެ ދިރިއުޅުމުގެ އެކި ކަންތައްތައް ކުރުމަށް އުނދަގޫވާ ފަހަރުތައްވެސް އާދެއެވެ. މިކަމަށް އެކިކަހަލަ ބޭސްތައް ބޭނުންކުރާ މީހުން މި ރާއްޖޭގައިވެސް ވަރަށް ގިނައެެވެ. ރޯޒްމެރީ އަކީ ހުޅުހުޅުގައި ރިއްސާ ފަރާތްތަކަށް އޮތް ގުދުރަތީ ފަރުވާއެކެވެ.

ދިރާސާތަކުން ދައްކާ ގޮތުގައި ރޯޒްމެރީއަކީ އާތްރައިޓިސް ފަދަ ބަލިތިކުގެ ސަބަބުން ހުޅުހުޅުގައި ރިއްސާނަމަ އެކަމަށް އޮތް ފަރުވާއެކެވެ. ހުޅުހުޅުގައި ރިއްސާނަމަ އެތަނެއްގައި ރޯޒްމެރީ އުނގުޅުމުން އެތަނެއްގެ ދުޅަކަން ތިރިކޮށްދީ ރިހުން ކުޑަކޮށްދެއެވެ. މިހެން މިކަން ވަނީ އޭގައި އެކުލެވޭ އެންޓި އޮކްސިޑެންޓުތަކާއި، އެންޓި އިންފްލެމޭޓަރީ ޕްރޮޮޕަޓީތަކުގެ ސަބަބުންނެވެ.

ސައިންސްވެރީންގެ ދިރާސާތަކުން އެނގޭގޮތުގައި ރޯޒްމެރީއަކީ ލޭހޮޅިތައް ފުޅާކުރުމަށް އެހީތެރިވެދޭ އެއްޗެކެވެ. އަދި ކަކުލުގައި ލޭދައުރުވުން ރަނގަޅު ކޮށްދީ ރިހުން ކުޑަ ކުރުމަށްވެސް ރޯޒްމެރީ އެހީވެދޭ ކަމަށްވެސް ދިރާސާތަކުން ދައްކައެވެ.

ރޯޒްމެރީއަކީ ހަށިގަނޑަށް ދިމާވާ އެހެނިހެން މައްސަލަތަކަށްވެސް އޮތް ފަރުވާއެކެވެ. އެގޮތުން ރޯޒްމެރީ ބޭނުން ކުރުމުން މީހާގެ މޫޑު ރަނގަޅުކޮށްދީ، ޑިޕްރެޝަން ފަދަ ނަފްސާނީ މައްސަލަތަކުން މީހާ ސަލާމަތް ކުރުމަށް އެހީވެދެއެވެ. އަދި މީހާގެ ސަމާލުކަން އިތުރުކޮށްދީ، ހަނދާން ހުންނަ މިންވަރު ރަނގަޅު ކޮށްދީ، އަލްޒައިމާސް ފަދަ ބަލި ތަކުން ރައްކާތެރި ކޮށްދިނުމަށްވެސް އެހީތެރިވެދެއެވެ.

އަދިހަމަ އެހެންމެ ރޯޒްމެރީ އަކީ ބޮލުގެ އިސްތަށިގަނޑަށްވެސް ވަރަށް ފައިދާ ހުރި އެއްޗެކެވެ. އެގޮތުން ރޯޒްމޭރީ ތެޔޮ ބޮލުގައި އުނގުޅުމުން ބޮލުގެ އިސްތަށިގަނޑު ވަރުގަދަ ކޮށްދީ، ބޯ ހިރުވުން ދުރުކޮށްދީ، އިސްތަށި ފެޅުމަށްވެސް އެހީވެދެއެވެ.