ލޮނުމެދަކީ ދުނިޔޭގެ އެކި ކަންކޮޅުތަކުގެ މީހުން ތަފާތު އެކި ގޮތްގޮތަށް ބޭނުންކުރާ އެއްޗެކެވެ. އެއީ އޭގައި ވަރަށް ގިނަ ސިއްހީ ފައިދާތައް އެކުލެވޭ އެއްޗެކެވެ. ސިއްހީ އެތަށް މައްސަލަތައް ހައްލު ކުރުމަށްޓަކައި، ލޮނުމެދު އެކި ގޮތްގޮތަށް ބޭނުން ކުރެއެވެ. އޭގެ ތެރެއިން އެންމެ ފާހަގަ ކޮށްލެވޭ ގޮތަކީ ސިއްހީ މައްސަލަތަކަށް ހައްލެއްގެ ގޮތުގައި ލޮނުމެދު ތެޔޮ ބޭނުން ކުރުމެވެ.

ލޮނުމެދު ތެލުން ލިބޭ ސިއްހީ ފައިދާތަކުގެ ތެރޭގައި;

އިންފެކްޝަން ތަކާ ދެކޮޅަށް މަސައްކަތް ކުރުން:

ލޮނުމެދު ތެލަކީ އެލިސިން ނަމަކަށް ކިޔާ މާއްދާއެއް ހިމެނޭ އެއްޗެކެވެ. މި މާއްދާއަކީ އޭގައި އެންޓި މައިކްރޯބިއަލް ޕްރޮޕަޓީތައް އެކުލެވިގެންވާ މާއްދާއެއް ކަމުން އޭގެ ސަބަބުން އެކިކަހަލަ ވައިރަސްތަކާއި، ޖަރާސީމުތަކާއި، އަދިވެސް އެފަދަ ހަށިގަނޑަށް ގެއްލުން ހުރި އެއްޗެހީގެ ފަރާތުން މީހާ ރައްކާތެރިކޮށްދެއެވެ. އެހެންކަމުން ލޮނުމެދު ތެޔޮ ބޭނުން ކުރުމުން އެކިކަހަލަ އިންފެކްޝަން ތަކުން މީހާ ރައްކާތެރި ކުރުމަށް އެހީވެދެއެވެ.

ހިތުގެ ބަލިތަކުން މީހާ ރައްކާތެރި ކުރުން:

ލޮނުމެދު ތެލުގައި ހިމެނޭ އެލިސިން އާއި ސަލްފަރު އެކުލެވޭ މާއްދާތަކަކީ މީހާގެ ލޭހޮޅިތަކުގެ މަސައްކަތް ރަނގަޅު ކޮށްދޭ، އަދި ހަށިގަނޑުގައި ލޭދައުރުވާގޮތް ރަނގަޅު ކޮށްދޭ މާއްދާތަކެވެ. މި މާއްދާތަކުގެ ސަބަބުން ގަވާއިދުން ލޮނުމެދު ތެޔޮ ބޭނުން ކުރާ ނަމަ ލޭގެ ޕްރެޝަރު ދައްކޮށްދީ، ހަށިގަނޑުގެ ކޮލެސްޓުރޯލް ލެވެލް ދައްކޮށްދެއެވެ. އަދި ހިތުގެ ބަލިތަކުން މީހާ ރައްކާތެރިކޮށްދޭން އެހީވެއެވެ.

ދިފާއީ ނިޒާމު ވަރުގަދަ ކޮށްދިނުން:

ލޮނުމެދު ތެލަކީ ގިނަ އަދަދަކަށް އެންޓި އޮކްސިޑެންޓު ހިމެނޭ ތެލެކެވެ. އެހެންކަމުން ގަވާއިދުން ލޮނުމެދު ތެޔޮ ބޭނުން ކުރާނަމަ މީހާގެ ދިފާއީ ނިޒާމު ވަރުގަދަ ކޮށްދީ، ބަލި ތަކާ ދެކޮޅަށް ހަނގުރާމަ ކުރުމަށް އެހީވެދެއެވެ. މިއީ ރޯގާ ފަދަ ބަލިތައް ޖެހުމުން އެބަލިތަކުން ސަލާމަތް ވުމަށްވެސް ވަރަށް ގިނަ މީހުން ބޭނުން ކުރާ އެއްޗެކެވެ.

ލޮނުމެދު ތެލަކީ ވަރަށް ފަސޭހަކަމާއިއެކު ގޭގައިވެސް ތައްޔާރު ކުރެވޭނެ އެއްޗެކެވެ. ލޮނުމެދު ތެޔޮ ތައްޔާރު ކުރުމަށް ބޭނުންވާނީ ލޮނުމެދާއި، ތެޔޮ ފުޅިއެކެވެ. މި ތައްޔާރު ކުރުމަށްޓަކައި އެމީހަކު ބޭނުން ވައްތަރެއްގެ ތެލެއް ބޭނުން ކުރެވިދާނެއެވެ.

ތައްޔާރު ކުރާނެ ގޮތް:

އެންމެ ފުރަތަމަ ލޮނުމެދު އަރިތައް ތުނިތުނިކޮށް ކޮށާލާނީއެވެ. އެއަށްފަހު ތެޔޮކޮޅު ތެރެއަށް ކޮށާފަހުރި ލޮނުމެދުކޮޅު އަޅައިގެން ކައްކާލާނީއެވެ. ކައްކައި ނިމުމުން މި ތެޔޮ ބިއްލޫރި ފުޅިއަކަށް އަޅާފައި ބަހައްޓާނީއެވެ.

ތައްޔާރު ކުރަން ފަސޭހަ މި ތެލަކީ އެކި ބަލިތަކަށް އޮށް ފަރުވާއަކަށް ވުމުން މިއީ ބޭނުން ނުކޮށް ދޫކޮށްލާ ވަރުގެ އެއްޗެއް ނޫނެވެ. ވީމާ ސިއްހީ މައްސަލަތަކުގައި ޑޮކްޓަރީ ބޭހުގެ ބަދަލުގައި ގުދުރަތީ ފަރުވާ ދޭން ބޭނުންވާނަމަ، މިއީ ތައްޔާރު ކޮށްފައި ބެހެއްޓުން ރަނގަޅު އެއްޗެކެވެ.