ބެޓް މޭން އާއި ޑެޑްޕޫލުގެ "ލަވްޗައިލްޑު" ގެ ރޯލު ކުޅެން ބޭނުންވާ ކަމަށް ބޮލީވުޑުގައި ވިދަމުން އަންނަ ބަތަލެއް ކަމަށްވާ ކުނާލް ކަޕޫރު ބުނެފިއެެވެ.

ކުނާލް މިހެން ބުނެފައިވަނީ ދާދި ފަހުން ދިން އިންޓަވިއުއެއްގައި އޭނާ ކޮމިކު ފޮތްތަކަށް ޝައުގުވެރިވާވަރު ހިއްސާކުރުމުން، އެކަމާ ގުޅުވައިގެން ކުނާލް އެންމެ ކުޅެން ބޭނުންވަނީ ކޮން ކެރެލްޓަރެއްތޯ އަހައި އޭނާއާ ސުވާލުކުރުމުންނެވެ. މި އިންޓަވިއުގައި އޭނާ ވަނީ އޭނާ ކޮމިކު ފޮތްތަކަށް ލޯބިޖެހި ގަޔާވި ގޮތް ކިޔައިދީފައެވެ. އެގޮތުން އޭނާ ބުނެފައިވަނީ ކުޑައިރުއްސުރެވެސް ކޮމިކު ފޮތްތައް ކިޔުމަށް ލޯބި ކުރާ ކަމަށާއި، ބޮޑުވަމުން އައި އިރު ޓިންޓިން އާއި، އެސްޓެރިކްސް އާއި، އިންޑިއާގެ ސުޕަހީރޯތައް ކަމަށްވާ ކޮމާންޑޯ ދުރުވް އާއި، ނަގްރާޖް ފަދަ ކޮމިކު ފޮތްތައްވެސް ކިޔާފައިވާ ކަމަށެވެ.

އަދި އޭނާގެ އުމުރުން 15 އަހަރުގައި ވޮޗްމޭން ނަމަކަށް ކިޔާ ކޮމިކު ފޮތްތަކެއް ކިޔާފއިވާ ކަމަށާއި، އެ ފޮތްތަކަކީ ކޮމިކު އާ ބެހޭ ގޮތުން އޭނާގެ ނަޒަރިއްޔާތު ބަދަލު ކޮށްލި ފޮތްތަކެއް ކަމަށް ކުނާލް ބުނެފައިވެއެވެ. ކުނާލު އިތުރަށް ބުނެފައިވަނީ އޭނާގެ ކަލެކްޝަނުގައި ވަރަށް ގިނަ ކޮމިކު ފޮތްތައް ހުންނާނެ ކަމަށާއި، އޭނާގެ ދަރިފުޅު ބޮޑުވުމުން އެ އެއްޗެހި އަގުހުރި ވާރުތަ މުދާ ފަދައިން އޭނާގެ ދަރިފުޅަށް އެ ލިބޭނެ ކަމަށެވެ.

ކުނާލް ކަޕޫރުވަނީ ދާދި ފަހުން ފިލްމު "ޖުވެލް ތީފް: ދަ ރެޑް ސަން ޗެޕްޓާ" ގެ ޝޫޓިން ނިންމާލާފައެވެ. ސިދާތު އަނަންދު ޕްރޮޑިއުސް ކޮށްފައިވާ މި ފިލްމުން އޭނާއާއެކު ލީޑު ރޯލުން ސައިފް އަލީ ޚާން ފެނިގެންދާނެއެވެ. އޭނާގެ ކުރިއަށް އޮތް ފިލްމުތަކުގެ ތެރޭގައި ރާމާޔަނާ އާއި، ވިޝްވަމްބަރާ ހިމެނެއެވެ. އަދި މީގެ އިތުރުން އެކްޝަން ސީރީސް އެއްގައި ވިޖިލަންޓީގެ ރޯލަކުންވެސް ކުނާލް ފެނިގެންދާނެ ކަމަށް ރިޕޯޓުތަކުގައި ވެއެވެ.