ބޮލީވުޑުގެ މަޝްހޫރު ތަރި ސަލްމާނު ޚާންގެ ފިލްމުތަކަށް 300 ކަރޯޑު ރުޕީސްގެ އާމްދަނީއެއް ނުލިބޭނަމަ އޭނާ އެކަމާ ވަރަށް ދެރަވާކަމަށް ބޮލީވުޑުގެ ފިލްމު ޕްރޮޑިއުސަރު ނިކިލް އަދްވާނީ ބުނެފިއެވެެ.

ދާދި ފަހުން ދަ ލަލަންޓޮޕް އަށް ދިން އިންޓަވިއުއެއްގައި ސަލްމާނު އާއެކު އެހާ ގިނައިން މަސައްކަތް ނުކުރާ ސަބަބު އަހައި ނިކިލް އާ ސުވާލު ކުރުމުން އޭނާ ބުނެފައިވަނީ ސަލްމާނުގެ ފިލްމުތަކަށް 300 ކަރޯޑު ރުޕީސްގެ އާމްދަނީއެއް ނުލިބޭނަމަ އޭނާ އެކަމާ ވަރަށް ހިތްހަމަ ނުޖެހި ދެރަވާ ކަމަށާއި، ސަލްމާނު ބޭނުންވަނީ ވަރަށް ބޮޑެތި ފިލްމު ތަކުގައި އެކްޓު ކުރަން ކަމަށެވެ. އޭނާ އިތުރަށް ބުނެފައިވަނީ އެހާ ބޮޑެތި ފިލްމު އުފެއްދުމުގެ ބުރަ އުފުލަން ބޭނުން ނުވާކަމަށާއި، މި ސަބަބައްޓަކާހުރެ އޭނާ ސަލްމާނު އާއެކު އެހާގިނައިން މަސައްކަތް ކޮށްފައި ނުވާކަމަށެވެ.

ނިކިލް އަދްވާނީ އާއި ސަލްމާނު ވަނީ މީގެ ކުރިން "ސަލާމް އޭ އިޝްގު" އާއި "ހީރޯ" ފަދަ ފިލްމުތަކުގައި އެކުގައި މަސައްކަތް ކޮށްފައެވެ. ޕްރޮފެޝަނަލް ގޮތުން މި ދެމީހުންނަށް މާގިނަ މަސައްކަތްތަކެއް އެކުގައި ކުރެވިފައި ނުވީނަމަވެސް ނިކިލް ވަނީ އޭނާއާއި ސަލްމާން އާއި ދެމެދު ވަރަށް ގާތް ގުޅުމެއް އޮންނަ ކަމަށާއި، އޭނާ ސަލްމާނު ދެކެ ވަރަށް ލޯބިވާ ކަމަށް ބުނެފައެވެ. އަދި އޭނާގެ އިމަޖެންސީ ކޮންޓެކްޓެއްގެ ގޮތުގައި ވެސް ސަލްމާނު ހުންނަ ކަމަށް ނިކިލް ވަނީ ބުނެފައެވެ.

ނިކިލް އަދްވާނީ އަކީ ބޮލީވުޑުގައި ވަރަށް ފާހަގަ ކޮށްލެވޭ، އަދި ނަން މަޝްހޫރު ފިލްމު ޕްރޮޑިއުސަރެކެވެ. އޭނާ މިހާރު އަންނަނީ އޭނާގެ ކުރިއަށް އޮތް އެކްޝަން ފިލްމު "ވެޑާ" ނެރުމަށް ތައްޔާރުވަމުންނެވެ. ޖޯން އަބްރަހަމްއާއި، ޝަރުވާރީއާއި، އަދި އަބިޝެކް ބެނާޖީ މުހިއްމު ރޯލުތަކުން ފެނިގެންދާ މި ފިލްމު ނެރުމަށް ތާވަލްކޮށްފައިވަނީ މި އޮގަސްޓް މަހުގެ 15 ވަނަ ދުވަހު ގައެވެ.