މަޝްހޫރު ލަވަ ކިޔުންތެރިޔާ ޑެމީ ލޮވާޓޯ މިއުޒިކު ޓުއަރތައް ދިނުން ހުއްޓާލައިފި ކަމަށް މީޑިއާތަކުން ރިޕޯޓު ކޮށްފިއެވެ.

ޑެމީ ލޮވާޓޯގެ ކުރިއަށް އޮތް ޑޮކިއުމެންޓަރީ "ޗައިލްޑް ސްޓާ" ޕްރޮމޯޓުކުރުމަށްޓަކައި ހޮލީވުޑު ރިޕޯޓަރއަށް ދާދި ފަހުން ދިން އިންޓަވިއުއެއްގައި އޭނާވަނީ ދެން އޭނާ މިއުޒިކު ޓުއަރތަކުން ފެނިގެން ދާނެހެން ހީނުވާ ކަމަށް ބުނެފައެވެ. އެގޮތުން އޭނާ ބުނެފައިވަނީ އޭނާއަކީ މިހާރު 15 އަހަރުގެ ކުއްޖެއް ނޫން ކަމަށާއި، މިފަދަ ޓުއަރތައް ދިނުމުން ހަށިގަނޑަށް ބޮޑެތި ބަދަލުތައް އަންނަ ކަމަށެވެ.

31 އަހަރުގެ ޑެމީ ލޮވާޓޯ އެންމެ ފަހުން ޓުއަރއެއްގައި ގޮސްފައިވަނީ އޭނާގެ އަށްވަނަ ސްޓޫޑިއޯ އަލްބަމް ކުރިއެރުވުމަށްޓަކައި 2022 ގަައެވެ. މި ޓުއަރގައި އުޅެނިކޮށް އޭނާއަށް ސިއްހީ މައްސަލަތަކެއް ކުރިމަތިވެފައިވާއިރު، އޭނާ ވަނީ އެ ޓުއަރއަކީ އޭނާގެ އެންމެ ފަހުގެ ޓުއަރ ކަމަށް ބުނެފައެވެ. އަދި ޓުއަރތަކަށް ނުދިޔަ ކަމުގައި ވީނަމަވެސް، އަދިވެސް އޭނާގެ ލަވަތައް ފެންނާނެ ކަމަށް އޭނާ ވަނީ ބުނެފައެވެ.

ޑެމީ ލޮވާޓޯ އަކީ ދުނިޔޭގެ އެކި ކަންކޮޅުތަކުގެ މީހުންގެ މެދުގައި މަގުބޫލު، އަދި އެތައް ބައެއްގެ ލޯބި ލިބިފައިވާ ލަވަކިޔުންތެރިއެކެވެ. އޭނާގެ ބައެއް މަޝްހޫރު ލަވަތަކުގެ ތެރޭގައި "ހާޓް އެޓޭކް" އާއި، "ސޮރީ ނޮޓް ސޮރީ" އާއި، "ލާ ލާ ލޭންޑް" ފަދަ ލަވަތައް ހިމެނެއެވެ. ޑެމީ އޭނާގެ ކުރިއަށް އޮތް ޑޮކިއުމެންޓަރީ ނެރުމުގެ ތައްޔާރީތައް ވަމުން އަންނަ އިރު، މި ޑޮކިއުމެންޓަރީ ނިކުތުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 17 ގައި ހޫލޫ އިންނެވެ.