އިނގިރޭސި ވިލާތުގައި މަސައްކަތް ކުރަން ބޭނުންވާ ކަމަށް ބޮލީވުޑުގެ މަޝްހޫރު ތަރި ޕަރިނީތީ ޗޯޕްރާ ބުނެފިއެވެ.

އޭނާ މިހެން ބުނެފައިވަނީ "އީސްޓަން އައި" އަށް ދިން އިންޓަވިއުއެއްގައި އިންޑިއާގެ ސިނަމާގެ އިތުރުން ހުޅަނގުގައި މަސައްކަތް ކުރުމުގެ ޝައުގުވެރިކަން ފާޅުކުރަމުންނެވެ. އެގޮތުން އޭނާ ބުނީ ހުޅަނގުގައި މަސައްކަތް ކުރަން ޝައުގުވެރިވާ ކަމަށާއި، އިނގިރޭސި ވިލާތުގައި އޭނާ ވަރަށް މަސައްކަތް ކުރަން ބޭނުން ވާ ކަމަށެވެ.

މީގެ އިތުރުން ޕަރިނީތީ ވަނީ އޭނާގެ އެކްޓިން ކެރިއަރުގައި ދެން ކުރިއަށް ދާން ބޭނުންވާ ގޮތްވެސް ހިއްސާ ކޮށްފައެެވެ. އެގޮތުން އޭނާ ބުނެފައިވަނީ އޭނާގެ ކެރިއަރުގައި މިހާރު ގިނަ ފިލްމު ކުޅެވޭތޯ ނުބަލާ ކަމަށާއި، އޭނާ ހިޔާރު ކުރަނީ ރީތި، މާނަފުން އޭނާއާ ގުޅޭ ފިލްމުތައް ކުޅެވޭތޯ ކަމަށެވެ. އަދި ރަނގަޅު ވާހަކައެއްގެ މައްޗަށް ބިނާކޮށް އެންމެ ފިލްމެއް ކުޅެން ލިބުނަސް އޭނާ އެކަމާ އުފާކޮށް އެ ރޯލެއް ވަރަށް ގަޔާވެގެން ހުރެ ކުޅޭނެ ކަމަށް ޕަރިނީތީ ވަނީ ބުނެފައެވެ.

ޕަރިނީތީ އަކީ ބޮލީވުޑުގެ އެންމެ މަގްބޫލު ތަރިންގެ ތެރޭގައި ހިމެނޭ ތަރިއެކެވެ. އޭނާ އެންމެ ފަހުން ފެނިފައިވަނީ އިމްތިއާޒް އަލީގެ ފިލްމެއް ކަމަށްވާ "އަމަރް ދޮންގު ޗަމްކިލާ" އިންނެވެ. މި ފިލްމުގައި އޭނާއާއެކު ލީޑު ރޯލު ކުޅެފައިވަނީ ދިލްޖިތު ދޯސަންޖު އެވެ. މިއަހަރު ކުރީކޮޅު ނެރެފައިވާ މި ފިލްމަށް ވަނީ ގިނަބައެއްގެ ތަރުހީބު ލިބިފައެވެ.