ހިންދީ ފިލްމު "މަރްދާނީ 3" ގެ ލީޑު ރޯލުންވެސް ރާނީ މުކަރުޖީ ފެންނާނެ ކަމަށް މީޑިއާތަކުން ރިޕޯޓު ކޮށްފިއެވެ.

ބޮލީވުޑުގެ މަޝްހޫރު ފިލްމު ފްރެންޗައިޒްއެއް ކަމަށްވާ މަރްދާނީގެ 3 ވަނަ ބައިގެ ލީޑުންވެސް ރާނީ މުކަރުޖީ ފެންނާނެ ކަމަށް ބޮލީވުޑު ހަންގާމާއިން ވަނީ ރިޕޯޓު ކޮށްފައެވެ. އެގޮތުން މަރްދާނީގެ އެހެން ފިލްމުތަކެކޭވެސް އެއްފަދައިން ތިން ވަނަ ބައިގައިވެސް ބިރުކުޑަ ފުލުސް އޮފިސަރެއް ކަމަށްވާ "ޝިވާނީ ޝިވާޖީ" ގެ ރޯލުން ރާނީ މުކަރުޖީ ފެންނާނެ ކަމަށް މި ރިޕޯޓުގައި ވެއެވެެ.

ޔަޝް ރާޖު ފިލްމްސް އިން އުފައްދާ މި ފިލްމު ފްރެންޗައިޒުގެ ތިން ވަބަ ބައި ކަމަށްވާ "މަރްދާނީ 3" އުފެއްދުމުގެ މަސައްކަތް މިހާރު ފަށާފައިވާއިރު، އަދި މި ފިލްމުގެ ބައެއް ކާސްޓުން ފައިނަލް ނުވާކަމަށް ރިޕޯޓު ތަކުގައި ވެއެެވެ. މި ފިލްމުގެ ފުރަތަމަ ބައި ނެރުނުތާ 10 އަހަރު ވެފައިވާއިރު، މި ފްރެންޗައިޒުގެ ފިލްމުތަކަށް އާންމުންގެ ބޮޑު ތަރުހީބެއް ވަނީ ލިބިފައެވެ. މި ފިލްމު ޝޫޓު ކުރުމުގެ މަސައްކަތްވެސް ވަރަށް އަވަހަށް ފަށާނެ ކަމަށް މީޑިއާތަކުން ވަނީ ރިޕޯޓު ކޮށްފައެވެ.

ރާނީ މުކަރުޖީއަކީ ބޮލީވުޑުގައި ނަން ވިދާ، އަދި އެތައް ބައެއްގެ ލޯބި ލިބިފައިވާ ތަރިއަކަށްވާއިރު އޭނާ ވަނީ ހިންދީ ސިނަމާއަށް ގިނަގުނަ ހިދުމަތްތަކެއް ކޮށްދީފައެވެ. އޭނާގެ ބައެއް މަޝްހޫރު ފިލްމުތަކުގެ ތެރޭގައި މަރްދާނީގެ އިތުރުން "މުޖުސޭ ދޯސްތީ ކަރޯގީ" އާއި "ކުޗް ކުޗު ހޯތާހޭ" އާއި "ކަބީ އަލްވިދާނާ ކެހެނާ" ފަދަ ބްލޮކުބަސްޓަރު ފިލްމުތައް ހިމެނެއެެވެ. އޭނާ އެންމެ ފަހުން ފެނިފައިވަނީ "މިސިސް ޗެތަރުޖީ ވާސެސް ނޯވޭ" އިންނެވެ.