ބޮލީވުޑުގެ ވިދަމުން އަންނަ ތަރި އަނަންނިޔާ ޕާންޑޭ ގެ ކުރިއަށް އޮތް ސީރީސް "ކޯލް މީ ބޭ" ޕްރޮމޯޓު ކުރުމުގެ ގޮތުން މެޓްރޯގައި ދަތުރު ކޮށްފިކަމަށް މީޑިއާތަކުން ރިޕޯޓު ކޮށްފިއެވެ.

ހިންދުސްތާނީ ޓައިމްސްގައިވާ ރިޕޯޓެއްގައި ބުނެފައިވަނީ "ކޯލް މީ ބޭ" ޕްރޮމޯޓު ކުރުމުގެ ގޮތުން އިއްޔެގެ ވަގުތެއްގައި އަނަންނިޔާ ވަނީ މުމްބާއީގެ މެޓްރޯގައި ދަތުރު ކޮށްފައި ކަމަށެވެ. އަދި އޭނާއާއެކު ފިލްމުގެ މުހިންމު ރޯލުތަކުން ފެންނަ އެހެނިހެން ތަރިންވެސް ބައިވެރިވެފައިވާ ކަމަށް ރިޕޯޓުގައި ވެއެވެ. އޭގެ ތެރޭގައި ވަރުން ސޫދު އާއި، ވިހާން ސަމަތު އާއި، ގުރުފަތޭހު ޕިރުޒާދާ ގެ އިތުރުން މުސްކާނު ޖަފޭރީ ހިމެނެއެވެ.

އާފިލްމެއް ޕްރޮމޯޓް ކުރުމަށް ބޮލީވުޑްގެ ތަރިން އަބަދުވެސް ފިލްމާ ގުޅުން ހުރި ތަފާތުކަންކަން ކުރާކަން ފާހަގަކޮށްލެވެއެވެ. އެގޮތުން "ކޯލް މީ ބޭ" ފިލްމު ޕްރޮމޯޓު ކުރުމަށް ފިލްމުގެ ތަރިން ދަތުރު ކޮށްފައިވަނީ ވެސްޓާން އެކްސްޕްރެސް މެޓްރޯ ސްޓޭޝަންގެ މެޓްރޯ ލައިނުތަކުންނެވެ. އެމީހުންވަނީ މި ދަތުރުގައި އާންމުންނާއި މުއާމަލާތުކޮށް އެމީހުންނާއެކު ފޮޓޯވެސް ނަގާފައެވެ. އަދި އެމީހުން ފިލްމުގެ ޕޯސްޓަރުތައް ކުރިމަތީ ހުއްޓިތިބެ ފޮޓޯ ނަގާފައިކަމަށްވެސް ރިޕޯޓުގައި ވެއެވެ.

އަނަންނިޔާއަކީ ބޮލީވުޑުގައި ވިދަމުން އަންނަ ތަރިއަކަށްވީއިރު، އޭނާގެ ބައެއް ފިލްމުތަކުގެ ތެރޭގައި "ގެހެރާއިޔާން" އާއި "ކޯގަޔޭ ހަމް ކަހާ" ފަދަ ފިލްމުތައް ހިމެނެއެވެ. އޭނާ މިހާރު މަސައްކަތް ކުރަމުން އަންނަނީ އޭނާގެ ކުރިއަށް އޮތް ސީރީސް "ކޯލް މީ ބޭ" ނެރުމަށެވެ. ކޮލިން ޑީ ކުންހާ ޑައިރެކްޓުކުރާ މި ސީރީސް ނެރުމަށް ހަމަޖެހިފައިވަނީ މި ސެޕްޓެމްބަރު މަހުގެ 6 ވަނަ ދުވަހުއެވެ.