ހިންދީ ބްލޮކްބަސްޓާ ފިލްމު "އެނިމަލް" ގައި މަސައްކަތްކުރުމުގެ ފުރުސަތު ނުލިބޭނެ ކަމަށް ހީވިކަމަށް ބޮބީ ޑިއޯލް ބުނެފިއެވެ.

އޭނާ މިހެން ބުނެފައިވަނީ ދާދި ފަހުން ހިއުމަންސް އޮފް ބޮމްބޭ އަށް ދިން އިންޓަވިއުއެއްގައި ފިލްމު "އެނިމަލް" އާ ބެހޭ ގޮތުން ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ ފިލްމުގެ އޮޑިޝަން އަށްފަހު ޝޫޓުތައް ފަށައި، ރަންބީރުގެ ޝޫޓުތަަކަށް މާ ގިނަދުވަސް ނަގާތީ އޭނާއަށް ފިލްމުގައި މަސައްކަތް ކުރުމުގެ ފުރުސަތު ނުލިބުނީ ކަމަށް ހީކުރެވުނު ކަމަށެވެ. އަދި ރަންބީރުގެ ހުނަރުގެ ސަބަބުން ފިލްމު އުފެއްދުންތެރިންނަށް އޭނާގެ ބޭނުމެއް ނޯންނާނެ ކަމަށް ހީވި ކަމަށްވެސް ބޮބީ ވަނީ ބުނެފައެވެ.

ބޮބީ އިތުރަށް ބުނެފައިވަނީ މި ފިލްމުގައި ބީރު މީހެއްގެ ރޯލު އަދާކުރަން ޖެހުމުން ފުރަތަމަ ފަސް ޖެހުނު ކަމަށާއި، ނަމަވެސް ތަފާތު ރޯލެއް ކުޅުމަށް ޝައުގުވެރިވާތީ އެ ރޯލު ނެގީ ކަމަށެވެ. އަދި މި ރޯލަށް ތައްޔާރު ވުމުގެ ގޮތުން "ސައިން ލެންގުއޭޖު" ވެސް ދަސް ކޮށްފައިވާކަމަށް ބޮބީ ވަނީ ބުނެފައެވެ.

ފިލްމީ ދާއިރާއާއި ދުރުގައި އުޅުމަށްފަހު ބޮބީ އެނބުރި އެކްޓު ކުރަން ފަށާފައިވަނީ ފިލްމު "އެނިމަލް" ގެ އެންޓެގޮނިސްޓެއްގެ ރޯލުންނެވެ. މި ފިލްމުގައި އޭނާ ދެއްކި ހުނަރު އެތައް ބަޔަކަށް ވަނީ ކަމުގޮސްފައެވެ. ބޮބީ ދެން އެންމެ އަވަހަށް ފެނިގެންދާނީ ތަމަޅަ ފިލްމު "ކަންގުވާ" އިންނެވެ.