ރެއިޑް ތަކުގައި ހަރަކާތްތެރިވާ އޮފިސަރުން ނަމަ ޔުނިފޯމްގެ އިތުރުން އިމިގްރޭޝަން ފާސް އޮންނާނެ ކަމަށް މޯލްޑިވްސް އިމިގްރޭޝަން ޑިޕާޓްމަންޓުން ބުނެފިއެވެ.

ގަވާއިދާ ހިލާފަށް އުޅޭ ބިދޭސީން އަތުލައިގަތުމަށް ހިންގާ އޮޕަރޭޝަންތަކުގައި އިމިގްރޭޝަން އޮފިސަރުން ތިބޭނީ އެ އިދާރާގެ ޔުނިފޯމް ލައިގެން ފާސް ހިފައިގެން ކަމަށް އިމިގްރޭޝަނުން ވަނީ ބުނެފައެވެ. އެ އިދާރާއިން މިހެން ބުނީ އޮޅުވާލައިގެން އިމިގްރޭޝަން އޮފިސަރުން ކަމަށް ހެދިގެން ބިދޭސީންގެ އަތުން ފޭރެމުންދާ މައްސަލަތަކެއް ފެންމަތިވުމާ ގުޅިގެންނެވެ.

އިމިގްރޭޝަނުން ބުނީ އެ އިދާރާގެ އޮފިސަރުން ކަމަށް ބުނެ ބަޔަކު އޮޅުވާލައިގެން ބިދޭސީން އުޅެމުންދާ ތަންތަން ބަލައި ފާސްކުރަމުންދާ ކަމުގެ މައުލޫމާތު ލިބިފައިވާ ކަމަށާއި މިފަދަ ކަންކަމަށް ސަމާލުވެ، ޝައްކުވާނަމަ، އެފަދަ މީހުންގެ ފާސް އަދި ފުރިހަމަ މައުލޫމާތު ބެލުމަށް އެންމެހާ ފަރާތްތަކަށް އެ އިދާރާއިން ވަނީ އިލްތިމާސް ކޮށްފައެވެ.

ދިވެހި ފުލުހުންގެ ހިދުމަތުން މިއަދު ބުނީ އިމިގްރޭޝަން އޮފިސަރުންގެ ނަމުގައި ބިދޭސީން ދިރިއުޅޭ ތަނަކަށް ތިން މީހަކު ވަދެ ބަންގްލަދޭޝް މީހެއްގެ އަތުން މޮބައިލް ފޯނަކާއި 9،000 ރުފިޔާ ފޭރުނު މައްސަލަ އެ އިދާރާއަށް ސެޕްޓެމްބަރު 16 ވަނަ ދުވަޖު ހުށައެޅުނު ކަމަށެވެ. އަދި މި މައްސަލަ އާއި ގުޅިގެން މީހަކު ހައްޔަރުކޮށްފައިވާ ކަމަށްވެސް ފުލުހުން ވަނީ ބުނެފައެވެ.

މާލެ ސަރަހައްދުގައި އިމިގްރޭޝަނުން ބޮޑު އޮޕަރޭޝަނެއް ފަށާފައިވާއިރު މި ދަނޑިވަޅާ ދިމާކޮށް އިމިގްރޭޝަންގެ ނަމުގައި ބައެއް ފަރާތްތަކުން ސްކޭމްތައްވެސް ހިންގާކަން ފާހަގަ ކުރެވެއެވެ. އެގޮތުން އިމިގްރޭޝަންގެ ޔުނީފޯމާ ވައްތަރު ޔުނީފޯމެއް އަޅައިގެން ތިބެ ސްކޭމް ވީޑިއޯ ކޯލްތަކެއް ކުރާ މައްސަލައެއް މީގެ ކުރިން ވަނީ ފެންމަތިވެފައެވެ.