ދުނިޔޭގެ އެތައް ބައެއްގެ މެދުގައި މަގުބޫލު ލަވަކިޔުންތެރިޔާ ބްރޫނޯ މާސްގެ ލަވައެއް ކޮޕީ ކުރި ކަމުގެ ތުހުމަތުތަކެއް ލަވަކިޔުންތެރިޔާ މައިލީ ސައިރަސްގެ މައްޗަށް ކޮށްފިކަމަށް މީޑިއާތަކުން ރިޕޯޓު ކޮށްފިއެވެ.

ހިންދުސްތާނީ ޓައިމްސްގައިވާ ރިޕޯޓެއްގައި ބުނެފައިވަނީ ބްރޫނޯ މާސްގެ ލަވައެއް ކޮޕީ ކުރުމުގެ ތުހުމަތު މައިލީގެ މައްޗައް ކޮށް، ޓެމްޕޯ މިއުޒިކު އިންވެސްޓްމެންޓުން ވަނީ މައިލީގެ މައްޗައް ގާނޫނީ ގޮތުން ފިޔަވަޅު އަޅަން ނިންމާފައި ކަމަށެވެ. އަދި އެމީހުން މިކަން މިހެން ކޮށްފައިވަނީ ބްރޫނޯ މާސްގެ ލަވަ "ވެން އައި ވޯޒް ޔޯ މޭން" ގެ ކޮޕީރައިޓު ހައްގު އޮންނާތީ ކަމަށްވެސް ރިޕޯޓުގައި ވެއެވެ.

މައިލީގެ ލަވަ "ފްލާވާސް" ގައި ބްރޫނޯގެ "ވެން އައި ވޯޒް ޔޯ މޭން" އަށް ރައްދު ދޭފަދަ އިބާރާތްތަކެއް ބޭނުން ކޮށްފައިވާއިރު، މި ދެ ލަވައިގެ މިއުޒިކުވެސް އެއްގޮތް ކަމަށް ރިޕޯޓުގައި ވެއެވެ. އަދި މައިލީގެ ލަވަ "ފްލާވާސް" އަށް ގްރެމީ އެވޯޑެއް ލިބިފައި ވަނީވެސް ބްރޫނޯގެ ލަވަ ކޮޮޕީ ކޮށްފައިވާތީކަމަށް ރިޕޯޓުގައި ވެއެވެ.

މައިލީގެ "ފްލާވާސް" ލަވައަކީ ދެ ލޯބިވެރިޔަކު ވަކިވުމަށްފަހު އަމިއްލަ ނަފްސަށް އެ އުފެދޭ ލޯބި ދައްކުވައިދޭ ލަވައަކަށްވީއިރު، ބްރޫނޯގެ ލަވައަކީ ލޯބިވެރިޔަކު ގެއްލިދާނެ ކަމުގެ ބިރު ހީވާތީ އެކަން ދައްކުވައިދޭ ލަވައެކެވެ. މި ދެ ތަރިންނަކީވެސް އެތައް ބައެއްގެ މެދުގައި މަގުބޫލު އަދި ހުނަރުން ފުރިފައިވާ ދެ ތަރިންނެވެ.