ނިރުބަވެރި އިސްރާއީލުން ޣައްޒާގެ މިސްކިތަކަށް ދިން ބޮމުގެ ހަމަލާއެއްގައި ފަލަސްތީނުގެ 21 މީހަކު ޝަހީދުކޮށްލައިފިއެވެ.

ފަލަސްތީނުގެ ނަސްލު ނެތިކޮށްލުމަށް އިސްރާއީލުން ފަށާފައިވާ ހަނގުރާމައިގެ ތެރެއިން ޣައްޒާގެ މިސްކިތަކަށް ދިން ބޮމުގެ ހަމަލާއެއްގައި ފަލަސްތީނުގެ 21 މީހަކު ޝަހީދުކޮށްލާފައިވާ ކަމަށް އެގައުމުގެ ކަމާބެހޭ ފަރާތްތަކާ ހަވާލާދީ މީޑިޔާތަކުން ވަނީ ބުނެފައެވެ. މި ހާދިސާގައި އިތުރު ދިހަވަރަކަށް މީހުން ވަނީ ޒަޚަމްވެފައެވެ.

މެދުއިރުމަތީގައި އިސްރާލުން ހިންގަމުންދާ މި ޖަރީމާތަކުގައި އެ ގައުމުން ދަނީ އެހެން ގައުމުތަކަށް ވެސް ހަމަލާތައް ދެމުންކަން ފާހަގަ ކުރެވެއެވެ. އެގޮތުން އިސްރާއީލުގެ އަސްކަރިއްޔާއިން އިއްްޔެ ލުބުނާނުގެ ވެރިރަށް ބައިރޫތުގެ ދެކުނުގެ ސަރަހައްދުތަކަށް ވެސް ވަނީ ވަރުގަދަ ހަމަލާތަކެއް ދީފައެވެ.

ލުބުނާނުގެ ސަލާމަތީ އިދާރާގެ މަސްދަރަކުން ބޭރުގެ މީޑިޔާ، އަލްޖަޒީރާއަށް މައުލޫމާތު ދެމުން ބުނީ މިދިޔަ ހުކުރު ދުވަހުން ފެށިގެން ޙިޒްބުاللهގެ އެގްޒެކެޓިވް ކައުންސިލްގެ ޗެއާމަން ހާޝިމް ސަފީއުއްދީންއާ ގުޅުން ކެނޑިފައިވާ ކަމަށެވެ.

ދުނިޔޭގެ އެކި ކަންކޮޅުތަކުގައި ދަނީ އިސްރާއީލުން ޣައްޒާއާ ދެކޮޅަށް ކުރާ ހަނގުރާމަ ހުއްޓާލުމަށް ގޮވާލަމުންނެވެ.

ޣައްޒާގައި 2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ދިން ހަމަލާތަކުގައި 41،825 މީހުން ޝަހީދުވެ 96،910 މީހުން ވަނީ ޒަޚަމްވެފައެވެ. އިސްރާއީލުގައި އޮކްޓޯބަރު ހަތް ވަނަ ދުވަހު ހަމާސް އިސްވެ އޮވެ ދިން ހަމަލާތަކުގައި 1،139 މީހުން މަރުވެ 200 އަށް ވުރެ ގިނަ މީހުން ރަހީނުކޮށްފައިވެއެވެ.