ބޮޑު ސްކްރީނުގައި ހިޓު ފިލްމުތަކެއް ގެނެސްދިން މަޝްހޫރު ތަރި ވިޖޭ ތެލެޕަތީއަށް ސިޔާސީ މައިދާނުގައިވެސް އާންމުންގެ ބޮޑު ތާއީދެއް ލިބިއްޖެއެވެ.

އިންޑިއާގެ ފިލްމީ ސިނާއަތަށް ގިނަ ހިދުމަތްތަކެއް ކޮށްދީފައިވާ ތަރި ވިޖޭ ތެލެޕަތީ ވަނީ މިއަހަރު އާ ޕާޓީއެއް އުފެއްދުމަށްފަހު ސިޔާސީ މައިދާނަށް ނިކުމެފައެވެ. އެގޮތުން ވިޖޭގެ ޕާޓީ އިފްތިތާހު ކުރުމަށް މިމަހު 27 ގައި ޖަލްސާއެއް ބާއްވާފައިވާއިރު، އެ ޖަލްސާ މާލަން ވަނީ އޭނާއަށް ތާއީދު ކުރާ ފަރާތްތަކުން ފުރި ބާރުވެފައެވެ.

މީސް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ވިޖޭގެ ޕާޓީގެ އިފްތިތާހީ ޖަލްސާއަށް އެތައް ބަޔަކު ވަނީ ގޮސްފައެވެ. އަދި އެތަނުގައި 5 ނުވަތަ 6 ލައްކަ މީހުން ތިބި ކަމަށް މީޑިއާތަކުން ވަނީ ރިޕޯޓު ކޮށްފައެވެ.

ސިޔާސީ މައިދާނަށް ވިޖޭ ނިކުތުމާއެކު އެތައް ބައެއްގެ ސަމާލުކަން ވަނީ ލިބިފައެވެ. އަދި އޭނާގެ މި ދަތުރުގައި އޭނާއަށް އެންމެ ގާތުން ސަޕޯޓު ކުރަމުންދަނީ ވިޖޭގެ ފޭނުންނެވެ.

ވިޖޭ ވަނީ މިހާތަނަށް ވަރަށް ގިނަ ހިޓު ފިލްމުތަކެއް ބެލުންތެރިންނަށް ގެނެސްދީ އެތައް ބައެއްގެ ހިތްތަކުން ޖާގަ ހޯދާފައެވެ. އަދި ވިޖޭ އަކީ އިންޑިއާ ސިނަމާގައި މިހާތަަނަށް އެންމެ ބޮޑު އާމްދަނީއެއް ލިބިފައިވާ އެކްޓަރު ކަމަށްވީއިރު، އޭނާގެ ކުރިއަށް އޮތް ފިލްމު "ތެލެޕަތީ 69" އޭނާ ކުޅެފައިވަނީ 275 ކަރޯޑު ރުޕީސް އަށް ކަމަށް ރިޕޯޓުތައް ބުނެއެވެ.

"ތެލެޕަތީ 69" ގެ ޝޫޓުތައް ފެށުމުގެ ކުރިން ވިޖޭ ވަނީ އޭނާ ފިލްމީ ދާއިރާއާ ދުރަށް ދާން އުޅޭ ކަމަށް އިއުލާން ކޮށް، މި ފިލްމަކީ އޭނާގެ އެންމެ ފަހު ފިލްމު ކަމުގައި ބުނެފައެވެ. ބޮޑު ސްކްރީނާ ދުރުވި ނަމަވެސް ވިޖޭގެ ފަހަތުގައި ވިޖޭގެ ސަޕޯޓަރުން ތިބޭނެކަން ޖަލްސާގައި އޭނާއަށް ލިބުނު ކާމިޔާބީއިން ވަރަށް ރަނގަޅަށް ހާމަވެއެވެ.