ބޮލީވުޑްގެ މަޝްހޫރު ގިނަ ތަރިންތަކެއް ކާސްޓުގައި ހިމެނޭ ފިލްމު "ހައުސްފުލް 5" ގެ އެންމެ ފަހު މަންޒަރުތައް އަންނަ މަހު މުމްބާއީގައި ޝޫޓު ކުރާނެ ކަމަށްް މީޑިއާތަކުން ރިޕޯޓު ކޮށްފިއެވެ.

ބޮލީވުޑް ހަންގާމާގައިވާ ރިޕޯޓެއްގައި ބުނެފައިވަނީ އަންނަ މަހު މުމްބާއީގައި "ހައުސްފުލް 5" ގެ ފަހު ޝޫޓުތައް ކުރިއަށްދާނެ ކަމަށެވެ. އަދި މުމްބާއީގައި ޝޫޓު ކުރުމަށް ހަމަޖެހިފައިވަނީ ފިލްމުގެ ނިންމުމާއި، ލަވަތަކެއް ކަމަށްވެސް ރިޕޯޓުގައި ވެއެވެ.

މި ފިލްމުގެ ބޮޑު ބައެއް މިހާރު ޝޫޓުކޮށް ނިމިފައިވާއިރު، މި މަންޒަރުތައް ޝޫޓު ކޮށްފައިވަނީ ޔޫރަޕްގެ "ކްރޫޒް ލައިނާ" އެއްގައެވެ. އަދި މުމްބާއީގައި ކުރިއަށްދާ ޝޫޓުތަކުގެ ސެޓުވެސް ތައްޔާރު ކޮށްފައިވަނީ ލަގްޒަރީ ކްރޫޒްއަކާ އެއްފަދަ ގޮތަކަށް ކަމަށް ރިޕޯޓުތައް ބުނެއެވެ.

"ހައުސްފުލް 5" ގައި ހިމެނޭ މުހިއްމު ތަރިންގެތެރޭގައި އަކްޝޭ ކުމާރު، ބޮބީޑިއޯލް، ރިތޭޝް ދޭޝްމުކް، އަބިޝެކް ބައްޗަން، އަދި ސަންޖޭ ދަތުގެ އިތުރުން ޖެކީ ޝްރޮފް ވެސް ހިމެނެއެވެ. މި ފިލްމު ނެރުމަށް ހަމަޖެހިފައިވަނީ 2025 ގެ ޖޫން 26 ގައެވެ.