ނިރުބަވެރި އިސްރާއީލުން މެދުއިރުމަތީގައި ހިންގަމުންދާ ޖަރީމާތަކުގައި އަންގާރަ ދުވަހު ދިން ހަމަލާތަކުގައި އެކަނިވެސް ޣައްޒާގެ 143 މީހުން ޝަހީދުކޮށްލާފައިވާ ކަމަށް އެގައުމުގެ މަސްދަރުތަކުން ހާމަކޮށްފިއެވެ.

މެޑިކަލް މަސްދަރުތަކާ ހަވާލަދީ ބޭރުގެ މީޑިޔާ، އަލްޖަޒީރާ އިން ބުނީ އިސްރާއީލުން ދެމުންގެންދާ ހަމަލާތަކުގައި މަރުވާ ކުޑަކުދިންނާ އަންހެނުންގެ އަދަދުވެސް އިތުރު ކަމަށާއި ކުށެއް ނެތް އެތައް ބަޔަކު މި ލާއިންސާނީ ޖަރީމާތަކުގައި ދުނިޔެ ދޫކޮށްފައިވާ ކަމަށް އެ ނޫހުން ބުނެއެވެ.

ލުބުނާނަށް ވެސް އިސްރާއީލުން ވަރުގަދަ ހަމަލާތަކެއް ދެމުންދާކަން ފާހަގަ ކުރެވެއެވެ. އެގޮތުން އަންގާރަ ދުވަހު ދިން ހަމަލާތަކުގައި އެކަނިވެސް ލުބުނާނުގެ 15 މީހުން ވަނީ މަރުވެފައެވެ.

އެމެރިކާއިން ހަތިޔާރު ފޯރުކޮށްދީގެން ކުރިއަށްގެންދާ މި ހަނގުރާމައާއި ބެހޭގޮތުން އިސްރާއީލުގެ މީޑިއާތަކުން ރިޕޯޓްކުރާ ގޮތުގައި އިސްރާއީލުން ލުބުނާނުގެ ސަރަހައްދަށް އެއްގަމު މަގުން ހަމަލާދެމުންދާއިރު އެގައުމުގެ ސިފައިންވެސް ދަނީ މަރުވަމުންނެވެ. އެގޮތުން މި މަސް ފެށުނުފަހުން ލުބުނާނުގެ ދެކުނުގައި ހިނގަމުންދާ ހަނގުރާމައިގައި 33 އިސްރާއީލު ސިފައިން މަރުވެފައިވާ ކަމަށް ވަނީ ބުނެފަ އެވެ.

ޣައްޒާގައި އޮކްޓޯބަރު 7، 2023 އިން ފެށިގެން އިސްރާއީލުން ދެމުންދާ ހަމަލާތަކުގައި 43،061 މީހުން މަރުވެ 101،223 މީހުން ވަނީ ޒަހަމްވެފައެވެ.

ލުބުނާނުގައި ހަނގުރާމަ ފެށިފަހުން އިސްރާއީލުން ދިން ހަމަލާތަކުގައި 2،787 މީހުން މަރުވެ 12،772 މީހުން ވަނީ ޒަޚަމްވެފައެވެ.