ބޮލީވުޑްގެ މަޝްހޫރު ތަރި އަނިލް ކަޕޫރު އޭނާގެ ކުރިއަށް އޮތް ފިލްމު "ސުބޭދާރު" ގެ ޝޫޓިން ފަށައިފިއެވެ.

އަނިލް "ސުބޭދާރު" ގެ މަންޒަރުތައް ޝޫޓު ކުރަން ފްށާފައިވާ ކަމަށް ޕްރައިމް ވީޑިއޯސް އިން ވަނީ އެމީހުންގެ އިންސްޓަގްރާމުގައި އިއުލާން ކޮށްފައެވެ. އެގޮތުން މި ފިލްމުގެ ސެޓުގައި ނަގާފައިވާ ފޮޓޯއެއް ޕްރައިމް ވީޑިއޯއިން ހިއްސާ ކޮށްފައިވާއިރު، އެ ފޮޓޯގެ ކެޕްޝަން ގައި ލިޔެފައިވަނީ ފައުޖީއަކު ދުވަހަކުވެސް ފަހަތަށް ނުޖެހޭނެ ކަމަށެވެ.

ސުރޭޝް ތުރިވޭނީ ޑައިރެކްޓު ކުރާ މި ފިލްމުގެ ވާހަކަ ބިނާވެފައިވަނީ އަސްކަރިއްޔާގައި މަސައްކަތް ކުރި ފައުޖީއަކު އޭނާގެ އާންމު ދިރިއުޅުމަށް އެނބުރި އައިސް ތަހައްމަލު ކުރާ ކަންކަމުގެ މައްޗަށެވެ. މި ފިލްމުގައި އަނިލް އާއެކު ލީޑުން ފެނިގެންދާނީ ރާދިކާ މަދަން އެވެ. އޭނާ މި ފިލްމުގައި ކުޅެނީ އަނިލްގެ ދަރިފުޅުގެ ރޯލު ކަމަށް ރިޕޯޓުތައް ބުނެއެވެ.

މި އަހަރަކީ އަނިލް ކަޕޫރަށް މަސައްކަތުގެ މައިދާނުގައި ވަރަށް ކާމިޔާބު އަހަރެކެވެ. އެގޮތުން ބޮކްސް އޮފީހުގައި އޭނާގެ ފިލްމު "ފައިޓާ" އަށް ބޮޑު ތާއީދެއް ލިބިފައިވާއިރު، އޭނާގެ ސީރީސް "ދަ ނައިޓް މެނޭޖާ" ވަނީ މިއަހަރުގެ އެމީ އެވޯޑްސް އަށްވެސް ނޮމިނޭޓު ވެފައެވެ. މީގެ އިތުރުން "އެނިމަލް" ގައި އޭނާ ދެއްކި ހުނަރަށް ވަނީ އައިއައިއެފްއޭ އެވޯޑެއްވެސް ލިބިފައެވެ.