އިރިޓެބަލް ބަވަކް ސިންޑްރޯމު (އައިބީއެސް) އަކީ ވަރަށް ގިނަ މީހުންނަށް ދިމާވާ ކަމަކަށްވީއިރު، މިކަމުގެ ސަބަބުން ބަނޑުގައި ރިއްސައި، ބަނޑުގައި ވައި ހެދި ބަނޑު ފުއްޕައި، ބޮޑު ކަމުދެވޭ ވަރަށްވެސް އަސަރު ކުރެއެވެ. މިއީ ވަރަށް ވޭންދެނިވި ކަމަކަށްވީއިރު މިބަލި ހުންނަނަމަ ބައެއް ކަހަލަ ކާއެއްޗެހި ކެއުމާއި ބުއިން ހުއްޓާލުމަކީ ވަރަށް މުހިންމު ކަމެކެވެ.

އެގޮތުން ބަލާއިރު މި ބަލި ހުންނަ ނަމަ ފެޓު އެކުލެވޭ ކާނާގެ ބާވަތްތައް ބޭނުން ކުރުމަކީ ރަނގަޅު ކަމެއް ނޫނެވެ. މި ބަލި ހުންނަ މީހުން ތެލުލީ ކާނާގެ ބާވަތްތަކާއި އެކިކަހަކަ ސޯސްތައް ބޭނުން ކުރާނަމަ ގޮހޮރުގެ މަސައްކަތްތަކަށް ބުރޫއަރައި، އޭގެ ސަބަބުން ބޭރަށް ހިނގުން ފަދަ މައްސަލަތައް ކުރިމަތިވެއެވެ. އަދި އޭގެ ސަބަބުން ބަލިވެސް އިތުރަށް ގޯސްވެއެވެ.

އަދި ކެފެއިން އަޅާފައި ހުންނަ ނުވަތަ ކާބޮނޭޓު ކޮށްފައި ހުންނަ ބުއިންތައް ބުއިމަކީވެސް މި ބަލީގެ އަލާމާތްތައް އިތުރަށް ގޯސްކުރުވާ ކަމެކެވެ. ކޮފީއާއި އެނާޖީ ޑްރިންކުފަދަ އެއްޗެހި ބޭނުން ކުރުމުން ހަޖަމުގެ ނިޒާމު ސްޓިމިއުލޭޓުވެ، އޭގެ ސަބަބުން ބޮޑުކަމުދެވޭ ވަރު އިތުރުވެ، ޑައިރިއާވެސް ޖެހެއެވެ. އަދި ކާބޮނޭޓު ކޮށްފައި ހުންނަ ބުއިންތައް ބޭނުން ކުރުމުން ގޮހޮރުގައި ކާބޮންޑައޮކްސައިޑު ގިނަވެ، ވައި ހެދި ބަނޑު ފުއްޕުމަށްވެސް މެދުވެރިވެއެވެ.

މީގެ އިތުރުން މި ބަލި ހުންނަ ނަމަ ކާއެއްޗެހި ފޮނިކުރުމަށް "އާޓިފަޝަލް ސުވީޓެނާ" ބޭނުން ކުރުމަކީވެސް ރަނގަޅު ކަމެއް ނޫނެވެ. ހަކުރުގެ ބަދަލުގައި ކުންފުނިތަކުން އުފައްދާފައި ހުންނަ އެއްޗެހި ބޭނުން ކުރާނަމަ، އެ އެއްޗެހި ގޮހޮރުގެ ތެރެއަށް ދަމައިގަނެ، ގޮހޮރުގައި ހުންނަ ޖަރާސީމުތައް އެއެއްޗެހި ފާމެންޓު ކުރެއެވެ. އަދި އޭގެ ސަބަބުން މީހާ ގޭސްވެ، ބަނޑު ފުއްޕައި ބޭރަށް ހިނގުމަށް މެދުވެރިވެއެވެ.

އެހެންކަމުން އައިބީއެސް ހުންނަނަމަ މި ބުނެވުނު އެއްޗެހި ބޭނުން ކުރުން ހުއްޓާލައި، ސިއްހަތަށް ފައިދާހުރި ކާނާގެ ބާވަތްތައް ބޭނުން ކުރުމަކީ ވަރަށް މުހިންމު ކަމެކެވެ. މިހެން އަމަލު ނުކޮށް މި އެއްޗެހި ބޭނުން ކުރާނަމަ އައިބީއެސް އިތުރަށް ގޯސްވެ، ހަށިގަނޑަށް ލިބޭ ގެއްލުންތައް އިތުރު ވެދާނެއެވެ.

މަސްދަރު: އިންޑިއަންއެކްސްޕްރެސް