އެމެރިކާގެ ހަތިޔާރު ބޭނުންކޮށްގެން އިސްރާއީލުން ޣައްޒާގެ ޖަބަލިއާގައި ހިންގި ޖަރީމާތަކުގައި 48 ގަޑިއިރުގެ ތެރޭ 50 އަށް ވުރެ ގިނަ ކުދިން މަރާލާފައިވާ ކަމަށް އދ އިން ބުނެފިއެވެ.

އދ. އިން ބުނާ ގޮތުގައި އިސްރާއީލުން ދަނީ ޣައްޒާގެ އެކި ހިސާބުތަކަށް މެދުކެނޑުމެއް ނެތި ހަމަލާތައް ދެމުންނެވެ. މި ހަމަލާތަކުގައި ކުޑަކުއްޖަކަށް، އަންހެނަކަށް ނުވަތަ އުމުރުން ދުވަސްވީ މީހަކަށްވެސް ނުބަލާ ކަމަށް އދ އިން ވަނީ ބުނެފައެވެ.

ޣައްޒާގައި އިންސާނީ އެހީ ފޯރުކޮށްދިނުމަށް ހަރަކާތްތެރިވާ ޑަބްލިއުއެޗްއޯގެ އޮފިޝަލުން ހާމަކުރާގޮތުގައި އިސްރާއީލުން ވަނީ ޣައްޒާ ސިޓީގައި ޕޯލިއޯ ވެކްސިން ދޭ މަރުކަޒަކަށްވެސް ހަމަލާދީފައެވެ. އޮފިޝަލުން ބުނީ އިސްރާއީލު ސިފައިން ސްޓަން ގްރެނޭޑެއް ވައްޓާލައި ދިން މި ހަމަލާގައި އެކަނިވެސް ހަތަރު ކުއްޖަކު ވަނީ ޒަހަމްވެފައެވެ.

ޣައްޒާގައި އިސްރާއީލުން ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މަދުވެގެން 43،314 ފަލަސްތީނު މީހުން މަރުވެ 102،019 މީހުން ޒަޚަމްވެފައިވެއެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި ގާތްގަނޑަކަށް 1،139 މީހުން މަރުވެ 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.

މެދުއިރުމަތީގެ ގައުމުތަކުގައި އިސްރާއީލުން ހިންގަމުންދާ ޖަރީމާތަކުގައި ލުބުނާނަށް ދެމުންދާ ހަމަލާތަކުގައި އިސްރާއީލުން ވަނީ 2،968 މީހުން މަރާލާފައެވެ. އަދި އިސްރާއީލުގެ މި ހަމަލާތަކުގައި 13،319 މީހުން ޒަޚަމްވެފައިވާ ކަމަށް ލުބުނާނުގެ ހެލްތު މިނިސްޓްރީއާއި ހަވާލަދީ ބޭރުގެ ނޫސްތަކުން ރިޕޯޓްކުރެއެވެ.