ޑިމާންޑު ބޮޑުވުމުގެ ސަބަބުން "ބޫލު ބުލައްޔާ 3" އާއި "ސިންގަމް އެގެއިން" ގެ ޝޯތަކެއް ދަންވަރު އަޅުވަން ނިންމައިފިއެވެ.

މިމަހު 1 ގައި ނެރުނު ދެ ފިލްމު ކަމުގައިވާ "ބޫލު ބުލައްޔާ 3" އާއި "ސިންގަމް އަގެއިން" އަށް ބެލުންތެރިންގެ ބޮޑު ތަރުހީބެއް ލިބި، މި ފިލްމުތަކަށް އޮތް ޑިމާންޑު ބޮޑު ވުމުގެ ސަބަބުން މި ދެ ފިލްމުގެވެސް އިތުރު ޝޯތައް ދަންވަރު ސިނަމާތަކުގައި އަޅުވަން ނިންމާފައިވާ ކަމަށް ޕިންކްވިލާއިން ވަނީ ރިޕޯޓު ކޮށްފައެވެ.

ބޫލުބުލައްޔާ 3 ގެ ލީޑު ތަރި ކާތިކު އާރިޔަން ވަނީ އޭނާގެ އިންސްޓަގްރާމުގައި މިކަން އިއުލާން ކޮށްފައެވެ. އެގޮތުން އޭނާ ބުނެފައިވަނީ އެ ފިލްމަށްް އޮތް ޑިމާންޑު ބޮޑުވެ، އިތުރު 3 ޝޯ އެއް ބާއްވަން ނިންމާފައިވާ ކަމަށެވެ. އަދި މި ޝޯތައް ބޭއްވުމަށް ހަމަޖެހިފައިވަނީ މެކްސަސް ސިނަމާގައި ކަމަށާއި، މި ޝޯތައް ބާއްވާނީ ދަންވަރު 1ގައި އާއި، 3 ގައި އާއި، އަދި ހެނދުނު 6 ގައި ކަމަށް އޭނާ ވަނީ ހާމަކޮށްފައެވެ.

އަދި ހަމަ މިފަދައިން "ސިންގަމް އަގެއިން" ގެވެސް އިތުރު ޝޯތަކެއް ސިނަމާތަކުގައި އަޅުވާނެ ކަމަށް ޕިންކްވިލާއިން ވަނީ ރިޕޯޓު ކޮށްފައެވެ. މި ފިލްމަކީ ބޮލީވުޑްގެ ނަން މަޝްހޫރު ތަރިން ހިމަނައިގެން އުފައްދާފައިވާ ފިލްމެކެވެ. އޭގެ ތެރޭގައި އަޖޭ އާއި، ކަރީނާ އާއި، ދިޕިކާ އާއި ރަންވީރުގެ އިތުރުން އަކްޝޭ ފަދަ އޭ ލިސްޓުގެ ތަރިން ހިމެނެއެވެ. އަދި މި ފިލްމުގައި ސަލްމާނުގެ ކެމިއޯއެއްވެސް ހިމެނެއެވެ.