އަޅުގަނޑުމެންގެ ގެރޭގައި ގިނަ މީހުންނަކީ ވަޒީފާ އަދާކުރާ މީހުންނެވެ. ވަޒީފާގައި މުޅި ދުވަހު ބިޒީކޮށް އުޅުމަށްފަހު ގެެއަށް އައިސް ސިއްހަތަށް ފައިދާހުރި ކާނާ ބޭނުން ކުރުކުގެ ބަދަލުގައި ގިނަ މީހުން އިހްތިޔާތު ކުރަނީ ތައްޔާރީ ކާނާއެވެ. ސަބަބަކީ މިފަދަ ކާނާގެ ބާވަތްތަކަކީ އަވަސް އަވަހަށް ކާލެވޭ އެއްޗެހި ކަމަށް ވާތީއެވެ. ނަމަވެސް މިފަދަ ތައްޔާރީ ކާނާގެ ބަދަލުގައި ވަގުތު ހުސްކޮށް ފައިދާހުރި އެއްޗެއް ތައްޔާރު ކޮށްގެން ލަސްލަހުން ކާނަމަ ހަށިގަނޑަށް ވަރަށް ގިނަ ފައިދާ ލިބެއެވެ.

އެގޮތުން ބަލާއިރު ކާއެއްޗެހި ލަސްލަހުން ކާނަމަ ހަޖަމުގެ މައްސަލަތަކާ މީހާ ދުރުވެއެވެ. ލަސްލަހުން ކެއުމުން ހަށިގަނޑުގައި ކާއެއްޗެހި ރަނގަަޅަށް ކުދިކުދި ވެއެވެ. އަދި ބޮޑަށް ހަފާފައި ކާއެއްޗެހި ދިރުވާއިރު އޭގައި ގިނަ އަދަދަކަށް ކުޅުވެސް ހުރެއެވެ. ކުޅަކީ އޭގައި ހަމަޖުގެ ނިޒާމުގެ މަސައްކަތް ފެށުމަށް އެހީވެދޭ އެންޒައިމުތައް ހުންނަ އެއްޗެއް ކަމުން ލަސްލަހުން ކާނަމަ ހަޖަމުގެ ނިޒާމުގެ މަސައްކަތް އަވަސްވެ، ކާއެއްޗެހި ހަޖަމު ކުރުމަށް ފަސޭހަވެއެވެ.

އަދި ލަސްލަހުން ކާނަމަ މީހާގެ ބަރުދަން ވެސް ލުއިވެއެވެ. މިކަން މިހެން ވަނީ ލަސްލަހުން ކެއުމުން ބަނޑު ފުރިފައިވާ ކަމުގެ އިހުސާސް މީހާއަށް ގިނައިރު ކުރެވޭތީއެވެ. އަދި އޭގެ ސަބަބުން ހަށިގަނޑަށް ބޭނުންވާ ވަރަށް ވުރެ އިތުރަށް ކެއުން ހުއްޓި، ހަށިގަނޑަށް އެތެރެވާ ކެލޮރީތައްވެސް މަދުވެއެވެ. އަދި އޭގެ ސަބަބުން މީހާގެ ބަރުދަން ލުއިވެއެވެ.

މީގެ އިތުރުން ލަސްލަހުން ކެއުމަކީ މީހާ ސްޓްރެސް ވުމާވެސް ދުރުކޮށްދޭ ކަމެކެވެ. ލަސްލަހުން ކެއުމަކީ މީހާގެ ސިކުނޑި ވަރަށް ބޮޑަށް ހަމަޖެހޭ ކަމެކެވެ. އަދި ލަސްލަހުން ކާއިރު، ކުރިމަތީގައިވާ ތަށީގައި ހުރި ކާއެއްޗެހި އަށް މީހާގެ ސަމާލުކަން ހުއްޓި އޭގެ ސަބަބުން އިތުރު ފިކުރުތަކާ ދުރަށް ދެވެއެވެ. އަދި މިކަމުގެ ސަބަބުން މީހާގެ ހިއްސުތައް ހަމަޖެހި، ސްޓްރެސް ވުމުން ދުރުކޮށްދެއެވެ.

ލަސްލަހުން ކެއުމަކީ މިހާ ފައިދާހުރި ކަމަކަށްވީއިރު، ކޮންމެ މީހަކުވެސް މިގޮތަށް ކެވޭތޯ މަސައްކަތް ކުރަން ޖެހެއެވެ. މީހާ ކިތައްމެ ބިޒީ ވިއަސް ކެއުމަށް ވަގުތު ހުސްކޮށް، ހަމަޖެހިލައިގެން ކެއުމަށް ސަމާލުވާން ޖެހެއެވެ.