އިސްރާއީލުން ހުއްޓުމެއްނެތި ފަލަސްދީނުގެ ޣައްޒާއަށާއި ލުބުނާނަށް ހަމަލާތައް ދެމުންދާކަމަށް ބޭރުގެ މީޑިޔާ ރިޕޯޓްތައް ބުނެފިއެވެ.

ޒަޔަނިސްޓް އިސްރާއީލުން އިއްޔެ އެކަނިވެސް ދިން ހަމަލާތަކުގައި ޣައްޒާގެ 44 މީހުން މަރުވެފައިވާއިރު ލުބުނާނުން 31 މީހުން ވަނީ މަރުވެފައެވެ. އިއްޔެގެ ހަމަލާތަކުގައި މަރުވި މީހުންގެ ތެރޭގައި ލުބުނާނުގެ ހަ ރެސްކިއު މަސައްކަތްތެރިންނާއި ފަލަސްތީނުގެ ތިން ރެސްކިއު މަސައްކަތްތެރިން ހިމެނެ އެވެ.

މެދުއިރުމަތީގައި އިސްރާއީލުން ނަސްލު ނައްތާލުމަށް ހިންގަމުންދާ ޖަރީމާތައް ހުއްޓާލުމަށް މަޝްވަރާތައް ފަށާފައިވީނަމަވެސް މިހާރު އެ މަޝްވަރާތައްވެސް ވަނީ ހުއްޓިފައެވެ. އަދި އެކަމުގައި އިސްކޮށް މަސައްކަތް ކުރާ ގަތަރުން ވަނީ މި މަޝްވަރާތައް މުއްދަތެއް ނެތް ގޮތަށް ހުއްޓާފައި ބޭއްވުމަށް ނިންމާފައެވެ.

ގަތަރުން ބުނާ ގޮތުގައި އިސްރާއީލާއި ހަމާސްއާ ދެމެދު މަޝްވަރާގެ މަސައްކަތްތައް މެދުކަނޑާލާފައިވަނީ، ހަމަނުޖެހުންތަކުގައި ބައިވެރިވާ ފަރާތްތަކުން އަނިޔާވެރި ހަނގުރާމަ ނިންމާލުމަށް ޝައުގުވެރިކަމާއި ”ސީރިއަސްކަން" ކުޑަކަމުންނެވެ.

ޣައްޒާގައި އިސްރާއީލުން ހިންގާ ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން 43،552 ފަލަސްތީނު މީހުން މަރުވެ 102،765 މީހުން ވަނީ ޒަޚަމްވެފައެވެ.

ލުބުނާނުގައި ޣައްޒާއާ ދެކޮޅަށް ހަނގުރާމަ ފެށިފަހުން އިސްރާއީލުން ދިން ހަމަލާތަކުގައި 3،136 މީހުން މަރުވެ 13،979 މީހުން ވަނީ ޒަޚަމްވެފައެވެ.