ރީނދުލަކީ އަޅުގަނޑުމެންގެ ގޭބިސީތަކުގައި އެކިކަންކަމަށް ގެންގުޅޭ އެއްޗެކެވެ. ކާބޯތަކެތީގެ ރަހަ މީރު ކުރުމަށާއި، ރޯގާފަދަ ކަންކަމުން ޝިފާ ހޯދުމަށް ވަރަށް ގިނަ މީހުން ރީނދޫ ބޭނުން ކުރެއެވެ. މިއީ ތަފާތު އެކި ނިއުޓްރިއެންޓުތަކާއި އެންޓި-އޮކްސިޑެންޓުތައް ހިމެނޭ އެއްޗެއްކަމުން ވަރަށް ގިނަ މީހުން ޒީނަތްތެރި ވުމަށްވެސް ރީނދޫ ބޭނުން ކުރެއެވެ.

ދާދި ފަހުން ސައިންސް އޮފް ދަ އެންވައިރަމެންޓަލް ޖާނަލްގައި ޝާއިއުކޮށްފައިވާ ދިރާސާއަކުން ދައްކާގޮތުގައި އިންޑިއާގެ ޕަތުނާ އަދި ޕާކިސްތާނުގެ ކަރާޗީ އާއި ޕޭޝަވަރުގައި އުފައްދާ ރީނދުލުގައި ގިނަ އަދަދަކަށް ލެޑު ހިމެނެއެވެ. އެގޮތުން މި ތަންތަނުން އުފައްދާ ރީނދުލުގައި 1000 ގްރާމަށްވުރެ ގިނައިން ލެޑު ހުންނަ ކަމަށް މި ދިރާސާއިން ވަނީ ހޯދިފައެވެ.

ލެޑަކީ ދަގަނޑުގެ ބާވަތަކަށް ވީއިރު، މިއީ އިންސާނާގެ ހަށިގަނޑަށް ވަރަށް ނުރައްކާތެރި މައުދަނެކެވެ. މި ދިރާސާއިން ދައްކާ ގޮތުގައި މިހާ ގިނަ އަދަދަކަށް ލެޑު އެކުލެވޭ ރީނދޫ ބޭނުން ކުރާނަމަ އޭގެ ސަބަބުން ލެޑު ޕޮއިޒަނިން އަށް މަގު ފަހިވެއެވެ. އަދި މީގެ އަސަރު އެންމެ ބޮޑަށް ކުރަނީ ކުޑަކުދިންނާއި ދޮށީ އުމުރުގެ މީހުންނަށް ކަމަށްވެސް ދިރާސާއިން ދައްކައެވެ.

ހަށިގަނޑަށް ލެޑު އެތެރެ ވުމުން އޭގެ ސަބަބުން އިންސާނާގެ ހަށިގަނޑުގެ މެޓަބޮލިކް މަސައްކަތްތަކަށް ބުރޫ އަރައެވެ. އަދި އޭގެ ސަބަބުން މީހާގެ ސިކުނޑިއަށް އަސަރު ކޮށް، ހިތުގެ ބަލިތައް ޖެހުމުގެ ފުރުސަތު ބޮޑުވެ، ކިޑްނީ ފެއިލް ވުމަށްވެސް މެދުވެރިވެއެވެ. އަދި އޭގެ ސަބަބުން ފުރާނައަށް ނުރައްކާވެ މަރުވެސް ވެދާނެއެވެ.

ދިރާސާވެރިން މިހާރު ދަނީ މި ދެ ގައުމުން އުފައްދާ ރީނދުލުގައި މައްސަލަ ހުރި މިންވަރު ބަލަމުންނެވެ. އަދި ސިއްހީ މާހިރުން ލަފާދެނީ ޕެކް ކޮށްފައި ހުންނަ ރީނދޫ ގަނެގެން ބޭނުން ކުރުމުގެ ބަދަލުގައި، އޯގަނިކް ރީނދޫ ހިޔާރު ކުރުމަށެވެ.

މަސްދަރު: އީޓައިމްސް