ތިން ކޮމިޝަނެއްގެ އިސް ބޭފުޅުން ވަކިކުރުމުގެ މައްސަލަ ކޮމިޓީއަށް ފޮނުވައިފި އެވެ.

މިނިވަން މުވައްސަސާތަކާ ބެހޭ ކޮމިޓީއަށް ހުށަހަޅާފައިވާ މައްސަލަތަކާ ގުޅިގެން ތިން ކޮމިޝަނެއްގެ އިސް ހަ ބޭފުޅަކު ވަކިކުރަން އެ ކޮމިޝަނުން ފޮނުވި ސިޓީތައް ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ އިއްވައިފަ އެވެ.

އެ ސިޓީތަކުގައި ވާގޮތުން ކޮމިޝަންތަކުގެ އުސޫލުތަކާ ހިލާފުވެފައިވާ ކަމަށް ބުނެ ވަކި ކުރަން ހުށަހަޅާފައި ވަނީ

ސިވިލް ސާވިސް ކޮމިޝަންގެ ރައީސް މުހައްމަދު ނާސިހާއި އިލެކްޝަންސް ކޮމިޝަންގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފާއި މެންބަރު ޑރ. މުހައްމަދު ޒާހިރު އެވެ.

އޭގެ އިތުރުން އެންޓި ކޮރަޕްޝަން ކޮމިޝަންގެ ނައިބުރައީސް އަބްދުއްސަލާމާއި މެންބަރު ތޯހާ މުހައްމަދުވެސް ވަކިކުރަން ހުށަހަޅާފައި ވެއެވެ.

އެ މައްސަލަތައް އިތުރަށް ދިރާސާކުރަން މަޖިލީހުގެ މިނިވަން މުވައްސަސާތަކާ ބެހޭ ކޮމިޓީއަށް ފޮނުވިކަން ވެސް މަޖިލީހުގެ ރައީސް އަބްދުއްރަހީމް އަބްދުﷲ ވަނީ އިއުލާންކުރައްވައިފަ އެވެ.