ނިރުބަވެރި އިސްރާއީލަށް އެހީތެރިކަންފޯރުކޮށްދެމުންދާ އެމެރިކާގެ ހަތިޔާރު ބޭނުންކޮށްގެން އިއްޔެ އެކަނިވެސް ޣައްޒާގެ 64 މީހުން ޝަހީދުކޮށްލާފައިވާ ކަމަށް ސިއްހީ އޮފިޝަލުންނާ ހަވާލަދީ ބޭރުގެ މީޑިޔާތަކުން ބުނެފިއެވެ.

ޣައްޒާގެ ސިއްހީ ވުޒާރާއާއި ހަވާލަދީ ނޫސްތަކުން ރިޕޯޓުކުރާ ގޮތުގައި ފާއިތުވި 48 ގަޑިއިރުގެ ތެރޭގައި އިސްރާއީލުން ޣައްޒާގެ އެކި ހިސާބުތަކަށް ދިން ހަމަލާތަކުގައި 147 މީހަކު ވަނީ ޒަހަމްވެފައެވެ.

ޒަޔަނިސްޓް އިސްރާއީލް އަސްކަރިއްޔާއިން ފަލަސްތީނުގެ ޣައްޒާއަށް ދެމުން އަންނަ ހަމަލާތަކަށް މިއަދަށް 404 ދުވަސް ވެގެން ގޮސްފައިވާއިރު މިހާތަނަށް ކުށެއް ނެތް 43،000 އަށްވުރެ ގިނަ މީހުން ވަނީ ޝަހީދުކޮށްލާފައެވެ.

މެދުއިރުމަތީގައި އިސްރާއީލުން ހިންގަމުންދާ ޖަރީމާތަކުގައި ޣައްޒާއަށް ދެމުންދާ ހަމަލާތައް މިހާރު ބޮޑަށް އަމާޒު ވަމުންދަނީ ސިއްހީ ނިޒާމުގެ ތެރެއަށެވެ. އެގޮތުން ހޮސްޕިޓަލްތަކާއި އެމްބިއުލާންސް ތަކާއި ސިއްހީ ހިދުމަތްތެރިންނަށް ސީދާ އަމާޒުތައް ދެމުންދާކަމަށް އޮފިޝަލުން މައުލޫމާތު ދެއެވެ.

07 އޮކްޓޯބަރު 2023 ގައި ނިރުބަވެރިން ދޭން ފެށި މި ހަމަލާތަކުގައި މިހާތަނަށް 103،076 މީހުން ވަނީ ޒަޚަމްވެފައެވެ.