ބޮޑެތި މީހުންނެކޭ އެއްފަދައިން ކުޑަކުދިންނަށްވެސް ހަކުރު ބަލި ޖެހިދާނެއެވެ. ނަމަވެސް ކުޑަކުދިންގެ ކިބައިގައި މި ބަލި ހުރިތޯ ދެނެގަތުމަކީ އެހާ ފަސޭހަކަމެއް ނޫނެވެ. މިކަން މިހެން ދިމާވަނީ ބަލި ޖެހުމުން އެކުދިންގެ ކިބައިން ފެންނާނެ އަލާމާތްތައް ގިނަ މީހުންނަށް ނޭނގޭތީއެވެ.

އެހެންކަމުން މިފަހަރު މި ހިމަނާލަނީ ހަކުރު ބަލި ޖެހިފައިވާ ކުޑަކުދިންގެ ފަރާތުން ފެނިގެންދާނެ ބައެއް އަލާމާތްތަކެވެ.

އަބަދު ބަނޑުހައިވުން

ހަކުރު ބަލީގެ އަލާމާތްތަކުގެ ތެރޭގައި ދަރިފުޅު އަބަދު ބަނޑުހައިވެގެން އެކަމާމެދު ޝަކުވާ ކުރުން ހިމެނޭ ކަމަށް ބައެއް ދިރާސާވެރިން ފާހަގަކުރެއެވެ. އެހެންކަމުން ދަރިފުޅުގެ ކެއިން ބުއިމަށް ބަދަލު އައިސް، އަބަދު ބަނޑުހައިވާކަމަށް ބުނެ ޝަކުވާ ކުރާނަމަ ޑޮކްޓަރަކަށް ދެއްކުމަކީ ވަރަަށް މުހިންމު ކަމެކެވެ.

މާ ގިނައިން ކުޑަކަމުދިއުން

މާ ގިނައިން ކުޑަކަމުދިއުމަކީވެސް ހަކުރު ބަލީގެ އަލާމާތެކެވެ. އެހެންކަމުން ދަރިފުޅު މާ ގިނައިން ކުޑަކަމުދާނަމަ، ނުވަތަ ގަޔަށް ކުޑަކަމުދާނަމަ އޭގެ ފަހަތުގައިވާ މައްސަލަތައް ބެލުމަށް ޑޮކްޓަރަށް ދެއްކުމަކީ ވަރަށް މުހިންމު ކަމެކެވެ.

ގޭސްވުން

މާބޮޑަށް ގޭސްވުމަކީވެސް ހަކުރު ބަލީގެ އަލާމާތެކެވެ. ދަރިފުޅު އަބަދު ގޭސްވެ، ބަނޑުގައި ރިއްސާތީ ޝަކުވާކޮށް، ހޮޑުލާނަމަ ވީހާވެސް އަވަހަށް ޑޮކްޓަރަށް ދައްކައި ޓެސްޓުތައް ހެދުމަކީ ވަރަށް މުހިންމު ކަމެކެވެ.

މާބޮޑަށް ބަލިވުން

ދަރިފުޅަށް ތަފާތު އެކިކަހަލަ އިންފެކްޝަން ޖެހި ބަލިވާ މިންވަރު އިތުރު ވުމަކީވެސް ހަކުރު ބަލި ޖެހިފައިވާ ކަމުގެ އަލާމާތެކެވެ. މިކަން މިހެންވަނީ ބަލީގެ ސަބަބުން ދަރިފުޅުގެ ދިފާއީ ނިޒާމު ބަލިކަށިވާތީއެވެ. އެހެންކަމުން ދަރިފުޅަށް އަރިދަފުސް ރޯގާފަދަ ސިއްހީ މައްސަލަ ޖެހޭ މިންވަރު އިތުރުވާނަމަ ޑޮކްޓަރަށް ދައްކައި ޓެސްޓު ހެދުމަކީ ވަރަށް މުހިންމު ކެމެކެވެ.