ނިރުބަވެރި އިސްރާއީލުން ލުބުނާނުގެ ސިއްހީ ދާއިރާގައި މަސައްކަތް ކުރާ ފަރާތްތަކަށް ދެމުންދާ ހަމަލާތައް އާންމުވަމުންދާކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ގެ ވެރިޔާ ޓެޑްރޯސް އަދަނޮމް ގެބްރެއިސަސް ވިދާޅުވެއްޖެއެވެ.

ޓެޑްރޯސް އަދަނޮމް ގެބްރެއިސަސް ވަނީ އިސްރާއީލުން އިއްޔެ ދިން ހަމަލާގައި ލުބުނާނުގެ 12 ޕެރަމެޑިކްސް މަރުވުމާ ގުޅިގެން އިސްރާއީލަށް ވަރަށް ބޮޑަށް ފާޑުވިދާޅުވެ މިފަދަ ކަންކަން އާންމުވަމުންދާކަމަށް ވިދާޅުވެފައެވެ.

ލުބުނާނުގެ ސިވިލް ޑިފެންސް ސެންޓަރަކަށް އިސްރާއީލުން ދިން ހަމަލާގައި ގާތްގަނޑަކަށް 12 ޕެރަމެޑިކްސް މަރުވެފައިވާ ކަމަށް އެގައުމުގެ ސިއްހަތާ ބެހޭ ވުޒާރާއާ ހަވާލަދީ ބޭރުގެ ނޫސްތަކުން ރިޕޯޓްކުރެއެވެ.

މިއަދު ލުބުނާނުގެ ސިއްހަތާ ބެހޭ ވުޒާރާއިން ބުނީ ފާއިތުވި 24 ގަޑިއިރުގެ ތެރޭގައި އެކަނިވެސް އިސްރާއީލުން ދިން ހަމަލާތަކުގައި އެގައުމުގެ 59 މީހުން މަރުވެ 182 މީހުން ޒަޚަމްވެފައިވާ ކަމަށެވެ.

މެދުއިރުމަތީގައި އިސްރާއީލުން ހިންގަމުންދާ ޖަރީމާތަކުގައި ފާއިތުވި 24 ގަޑިއިރުގެ ތެރޭގައި ފަލަސްތީނުގެ 28 މީހަކު މަރުވެ، 120 މީހަކު ޒަޚަމްވެފައިވާ ކަމަށް އެގައުމުގެ ސިއްހަތާ ބެހޭ ވުޒާރާއިން ރިޕޯޓްކޮށްފައިވެއެވެ.

ޣައްޒާގައި އިސްރާއީލުން ހިންގަމުންދާ ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން 43،764 މީހުން މަރުވެ 103،490 މީހުން ވަނީ ޒަޚަމްވެފައެވެ.

ލުބުނާނުގައި އިސްރާއީލުން ދެމުންދާ ހަމަލާތަކުގައި 3،445 މީހުން މަރުވެ 14،599 މީހުން ޒަޚަމްވެފައިވެއެވެ.