ފަލަސްތީނުގެ ނަސްލު ނައްތާލުމަށް އިސްރާއީލުން ހިންގަމުންދާ ޖަރީމާގެ ތެރެއިން އެންމެ ދުވަހެއްގެ ތެރޭގައި ޣައްޒާގެ 111 މީހުން ޝަހީދުކޮށްލައިފިއެވެ.

ހޮނިހިރު ދުވަހު އެކަނިވެސް ޣައްޒާގެ 111 މީހުން ޝަހީދުވެފައިވާ ކަމަށް ޣައްޒާގެ ކަމާއިބެހޭ ފަރާތްތަކާ ހަވާލަދީ ބޭރުގެ މީޑިޔާތަކުން ވަނީ ރިޕޯޓްކޮށްފައެވެ.

ޣައްޒާ ހިމެނޭހެން މެދުއިރުމަތީގެ އެހެން ހިސާބުތަކަށްވެސް އިސްރާއީލުން އަންނަނީ ހުއްޓުމެއްްނެތި ހަމަލާތައް ދެމުންނެވެ. އެގޮތުން މި ހަމަލާތަކުގެ ތެރެއިން ލުބުނާނުގެ ވެރިރަށް ބެއިރޫތުގެ މެދުތެރެއަށް ދިން ވައިގެ ހަމަލާއެއްގައި ހިޒްބުاللهގެ އެންމެ އިސް މީޑިއާ ރިލޭޝަންސް އޮފިސަރު މުހައްމަދު އަފީފްވެސް ވަނީ އަވަހާރަކޮށްލާފައެވެ.

ޣައްޒާގައި އިސްރާއީލުން ހިނގަމުންދާ ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން 43،846 މީހުން މަރުވެ 103،740 މީހުން ވަނީ ޒަޚަމްވެފައެވެ.

ލުބުނާނުގައި އިސްރާއީލުން ދެމުންދާ ހަމަލާތަކުގައި 3،481 މީހުން މަރުވެ 14،786 މީހުން ޒަޚަމްވެފައިވެއެވެ.